तामाखानीमा पुग्यो केन्द्रिय प्रसारण लाईन, ९० प्रतिशत जनताको घरमा विद्युत

फाल्गुन ५, सोलुखुम्बु । सोलुखुम्बुको सोलुदुधकुण्ड नगरपालिका वडा नम्बर ३ लोदिङमा केन्द्रिय प्रसारण लाइनको विद्युत परिक्षण सफल भएको छ ।  लामोसमय देखी माइक्रो हाइड्रोबाट विद्युत उपभोग गर्दै आइरहेका वडावासी अव भने केन्द्रिय प्रसारण लाइन अन्तर्गतको विद्युतमा जोडिएको हुन ।  नेपाल विद्युत प्राधिकरणको ग्रामीण विद्युतीकरण कार्यक्रम वडामा सम्पन्न भएसँगै आइतबार र सोमबार विद्युत परिक्षण गरिएको वडा अध्यक्ष ल्हाक्पा गेलु शेर्पाले बताउनुभयो ।

 करिव २ सय ९० घरधुरीको बसोबास रहेको वडामा हाल सम्म केन्द्रिय प्रसारणलाइन नपुग्दा अनेकन समस्या भोगिरहनुपरेको भएपनि सोमबारबाट सबै समस्या हल भएको अध्यक्ष शेर्पाले बताउनुभयो । माइक्रो हाइड्रोले माग धान्न नसक्दा राम्रोसँग विद्युत बाल्न नपाएका वडावासीले अव भने समस्या भोग्नु नपर्ने अध्यक्ष शेर्पाको भनाई छ ।  माइक्रो हाइड्रोबाट विद्युत प्रयोग गर्दा मोबाइल चार्ज गर्न, अनइ घरायसी काम गर्न देखी नागरिकको दैनिकी समेत प्रभावित भएको थियो ।

 तर अव भने यि सबै समस्याको हल वडा आफैले अग्रपङ्तिमा खटिएर समाधानको प्रयास गरेको अध्यक्ष शेर्पाले जिकिर गर्नुभयो ।  वडा कार्यालयले नै कागजात सङ्कलन गरेर विद्युत वितरण केन्द्र सल्लेरीबाट हाल सम्म २ सय वटा मिटरबक्स नागरिकको घरमा जडान गरि प्रसारणलाइन परिक्षण गरिएको उहाँको भनाई छ ।  वडाको तामाखानी, फलामखानी, माठुङ, लोदिङ लगायतका करिव ९० प्रतिशत भूगोलमा केन्द्रिय प्रसारण लाइन पुगिसकेको जनाइएको छ ।  वडावासीको विद्युतको समस्या हल गरिसकेपछि अव उज्यालो वडा बन्ने क्रममा आफूहरू रहेको उहाँको भनाई छ ।