भूकम्पले संखुवासभा र भोजपुरका दुई घरमा क्षति

फागुन १६, सोलुखुम्बु । शुक्रबार बिहान गएको भूकम्पका कारण संखुवासभा र भोजपुरका दुई घरमा क्षति पुगेको छ । यद्यपि, कुनै मानवीय क्षति नभएको प्रहरीको भनाइ छ । कोशी प्रदेशका प्रहरी प्रमुख डीआईजी राजन अधिकारीका अनुसार संखुवासभाको भोटखोला गाउँपालिका–१, किमाथांकाका ३८ वर्षीय फुर्पु नावाको घर आंशिक रूपमा क्षतिग्रस्त भएको छ ।

ढुंगाको गाह्रो र टिनको छानो भएको दुई तले घरको पूर्वी भाग भासिएको छ, जसका कारण पर्खाल चर्किएको छ। तर, घर मानिस बस्न सक्ने अवस्थामै रहेको अधिकारीले जानकारी दिनुभयो । त्यस्तै, भोजपुरको षडानन्द नगरपालिका–१३, पातलका ६४ वर्षीय सन्तबहादुर तामाङको घरमा पनि भूकम्पको असर देखिएको छ । ढुंगा र माटो प्रयोग गरी बनाइएको तीनतले घरको गाह्रो चर्किएको छ भने नजिकै रहेको ग्वाली घरसमेत क्षतिग्रस्त भएको छ ।

डीआईजी अधिकारीले भूकम्पका कारण अन्य क्षेत्रबाट कुनै ठूलो क्षतिको सूचना नआएको बताउनुभएको छ । पहाडी क्षेत्रमा केही घर चर्किए पनि तराई क्षेत्रमा कुनै असर नदेखिएको प्रहरीको भनाइ छ । स्थानीय तह र जनप्रतिनिधिहरूसँग समन्वय गरी थप विवरण संकलन भइरहेको छ। यो भूकम्प आज बिहान २ः५१ बजे सिन्धुपाल्चोकको भैरवकुण्ड केन्द्रविन्दु भएर ६.१ म्याग्निच्युडको गएको थियो ।