सोलुमा विद्युतको हविगत ः यता हवा चल्यो उता विजुली चैट

फागुन १७, सोलुखुम्बु । सोलुखुम्बुमा नेपाल विद्युत प्राधिकरणबाट प्रसारित लाइन २ दिन देखी अवरुद्ध बनेको छ । केन्द्रिय प्रसारण लाइन अन्तर्गतको विद्युत अवरुद्ध हुँदा सोलुखुम्बुका नागरिक २ दिन देखी अध्याँरोमा बस्न बाध्य बनेका छन् ।  ग्रामीण भेगका नागरिकलाई विजुलि अवरुद्ध हुँदा सञ्चार लगायत विद्युत जन्य विभिन्न समस्याको सामना गरिरहनु परेको छ ।  सामान्य हावाहुरी आउने बित्तिकै अवरुद्ध हुने केन्द्रिय प्रसारण लाइनको पुरानै अवस्था जिउँकातिउँ रहदा जिल्लावासीले सास्ती खेप्नु परेको छ ।

विहीबार रातीबाट चलेको हावाहुरीले शुक्रबार बिहानै देखी विद्युत अवरुद्ध छ ।  जिल्लाका ८ पालिका मध्ये जिल्ला सदरमुकाम समेत रहेको सल्लेरी बजार क्षेत्रमा २ दिन देखि विद्युत अवरुद्ध हुदा बजारवासी उस्तै मर्कामा छन् ।   लगातार विद्युत अवरुद्ध हुदा जिल्ला स्थित सरकारी कार्यालय सङ्घसंस्थाको सेवा समेत अवरुद्ध छ भने विद्युत प्राधिकरण र मातहतका वितरकहरूकाे हविगत देखिएको छ ।  सञ्चार माध्यमहरू पूर्ण प्रसारणमा नआउँदा नागरिक सूचना बाट पनि बञ्चित छन् ।  

प्राधिकरणको भन्दा अव्बल सेवा पाउने आशामा वैकल्पिक विद्युत वितरक संस्था सल्लेरी च्याल्साबाट विद्युत सेवा लिइरहेका जिल्ला सदरमुकाम बासीले पनि हावाहुरीको समयमा अध्याँरोमा बस्नु पर्ने बाध्यता पर्दै आएको छ । प्रभावकारी सेवा दिने नाममा चर्को विद्युत महशुल लागू गर्दै आउको उक्त संस्थाको विद्युत पनि सदरमुकाम क्षेत्रमा २ दिन देखी अवरुद्ध नै छ ।  

थुलुङ दुधकोशी गाउँपालिका पुरै अन्धकारमा रहेको जनाइएको छ ।  गाउँपालिकाको पञ्चन क्षेत्रमा विद्युत अवरुद्ध हुँदा मोवाईल चार्ज गर्न समेत समस्या भएको वडा अध्यक्ष इन्द्रमणि दाहालले बताउनुभयो ।  थुलुङ जस्तै अन्य पालिकाहरूमा पनि अहिले विद्युत अवरुद्ध छ । नेचासल्यान, सोताङ लगायत ग्रामीण पालिकाहरूमा समेत विद्युत अवरुद्ध रहेको स्थानीयहरु बताउँछन् ।