फागुन १८, सोलुखुम्बु । खोटाङको ऐसेलुखर्क गाउँपालिका ७ माक्पा क्षेत्रको मटेउली बेप्ला सडकखण्डको उद्घाटन गरिएको छ । गाउँपालिका अध्यक्ष गिरेन्द्र बहादुर राईको प्रमुख आतिथ्यतामा उक्त सडकखण्डको नयाँ ट्रयाक ओपन सम्पन्न गरि शनिबार उद्घाटन गरिएको हो ।
ऐसेलुखर्क गाउँपालिकाको स्काभेटर प्रयोग गरेर खनिएको उक्त सडक खण्ड करिव ३ दशमलव २ किलोमिटर लामो रहेको जनाइएको छ । करोडौँ रकम खर्चिएर गर्नुपर्ने सडक निर्माणको काम गाउँपालिकाको आफ्नै हेबी इक्विपमेन्ट हुँदा केही लाखमै सम्पन्न गर्न सकिने एउटा उदाहरणको रुपमा सडक रहेको गाउँपालिका अध्यक्ष गिरेन्द्र बहादुर राईले बताउनुभयो ।
शनिबार मटेउली बेप्ला सडक निर्माण उपभोक्ता समितिले आयोजना गरेको सडक उद्घाटन कार्यक्रममा स्थानीय ९४ वर्षीय ज्येष्ठ नागरिक झमक राईले अध्यक्षता गर्नुभएको थियो । सडक उद्घाटन कार्यक्रममा गाउँपालिकाका उपाध्यक्ष राजेश कुमार राजभण्डारी, प्रमुख प्रशासकीय अधिकृत रेख बहादुर थापा विशेष आतिथ्यता रहेको थियो ।
यस्तै वडा नम्बर–३ का वडा अध्यक्ष टेकेन्द्र राजभण्डारी, वडा नम्बर –५ का वडा अध्यक्ष श्री टङ्कराम राई, वडा नम्बर–७ का वडा अध्यक्ष श्री अरुण राई, कार्यपालिका सदस्य, वडा सदस्यहरू लगायत स्थानीय सरोकारवालाहरूको उपस्थिति रहेको थियो ।
Discussion about this post