ओखलढुङ्गाका राईको गाँजा किन्ने क्रममा विवाद हुँदा हत्या गरिएको पुष्टि

फागुन १८, सोलुखुम्बु । काठमाडौँ महानगरपालिका–४ सुकेधारास्थित धोविखोला करिडोरमा अडवीर राई मृत भेटिए छन् । फागुन १४ मा मृत भेटिएका अडवीर लैङ्गिक अल्पसङ्ख्यक हुन् । ओखलढुङ्गाको मानेभञ्ज्याङ गाउँपालिका–६ घर भएर काठमाडौँ–७ बस्दै आएका अडवीरको हत्या भएको प्रहरीको अनुसन्धान निष्कर्ष छ ।

हत्या आरोपमा दोलखाको मेलुङ गाउँपालिका घर भएका विराट ठकुरीलाई प्रहरीले पक्राउ गरेको छ । जिल्ला प्रहरी परिसर काठमाडौँको टोलीले उनलाई भक्तपुरको सल्लाघारीबाट पक्राउ गरेको हो । २९ वर्षीय ठकुरी काठमाडौँमा चल्ने बा.४ ख ५९९३ नम्बरको बसको सहचालक हुन् । गाँजा किनबेचको विषयमा विवाद हुँदा ५० वर्षीय अडवीरको हत्या भएको प्रहरीको अनुसन्धानबाट थाहा भएको छ । फागुन १३ मा राति चालकले गाडी पार्किङ गरेपछि विराट ठकुरी चाबहिल चोकमा जान्छन् ।

मालपोत कार्यालय चाबहिल भन्दा पारिपट्टि धोविखोला करिडोर बस पार्किङ हुँदै आएको थियो । भोलिपल्ट शिवरात्रि थियो । चाबहिल चोकमा महिलाको पहिरनमा भेटिएका अडवीर र ठकुरीको बिचमा गाँजा किनबेच गर्ने कुरा हुन्छ । अनुसन्धानमा संलग्न अधिकृतहरूका अनुसार अडवीरसँग १० पोका गाँजा थियो । ठकुरीले आफू काम गर्ने गाडी पार्किङ गरेको ठाउँमा गएर गाँजा किन्ने कुरा गरे । त्यसपछि उनीहरू चाबहिलबाट सुकेधारातर्फ लाग्छन् ।

करिडोरमा पुगेपछि गाँजाको रकमबारे विवाद हुँदा आरोपीले अडवीरको हत्या गरेको जिल्ला प्रहरी परिसर काठमाडौँका एसपी अपिल बोहराले रातोपाटीलाई बताए । हत्यापछि राईको शव नजिकैको शौचालयमा लगेर म्याट्रेस, सिरानी, झोला र फोहोरले छोपेर राखिदिए । त्यसपछि उनी बसभित्र छिरेर सुते । जिल्ला प्रहरी परिसर काठमाडौँका डीएसपी प्रह्लाद कार्की नेतृत्वको टिमले सीसीटीभीको सहायताले आरोपीलाई पक्राउ गर्न सफल भएको छ ।

अनुसन्धानमा संलग्न एक जना अधिकृत भन्छन्, ‘सीसीटीभीबाट बस र आरोपीको हुलिया पहिचान गरेपछि पक्राउ गर्न सहज भयो ।’ आरोपीलाई प्रहरी वृत्त महाराजगञ्जले ज्यान सम्बन्धी कसुरमा मुद्दा चलाएको छ । राईको टाउको, निधार र नाकमा लागेको थियो ।