महिलाहरूले गरेका काममा भ्रष्टाचार हुँदैन ः अध्यक्ष राई 

फागुन २४, सोलुखुम्बु ।  माप्य दुधकोशी गाउँपालिकाका अध्यक्ष बुद्धिकिरण राईले महिलाहरूले बजेट माग गर्नुपर्ने बताउनुभएको छ ।  उहाँले आज गाउँपालिकामा आयोजित एक कार्यक्रमका अवसरमा महिलाहरूको नेतृत्वमा काम गर्नका लागी वडामा बजेट छुट्याउन गाउँपालिका तयार रहेको भन्दै के कार्यक्रम गर्ने हो त्यसको निश्चितता गरेर बजेट माग गर्नका लागी आह्वान गर्नुभयो ।  उहाँले महिलाहरूले गरेका काममा पारदर्शिता हुने भन्दै बजेट माग गर्न आउन आह्वान गर्नुभएको हो ।

 सगरमाथा महिला कृषक समुह माप्य दुधकोशी गाउँपालिका ६ ले १ सय १५ औँ अन्तराष्ट्रिय नारी दिवसको अवसरमा आयोजना गरेको लोक गीत तथा बक्तृत्वकला प्रतियोगिताको अवसरमा बोल्दै अध्यक्ष राईले यस्तो बताउनुभएको हो ।  यहाँ आयोजित उक्त कार्यक्रममा गाउँपालिका उपाध्यक्ष गौरव राईको विशेष आतिथ्यता रहेको थियो । कार्यक्रमका विशेष अतिथि राईले महिलाहरूले स्वतन्त्रता नपाएको विषयमा छलफल गर्नुपर्ने बताउँदै उहाँले पछिल्लो समय महिलाहरू समेत नेतृत्वमा पुगेको भन्दै खुसी व्यक्त गर्नुभयो ।

 गाउँपालिकाले वडा नम्बर ६ मा कार्यक्रम भएकोमा खुसी व्यक्त गर्दै महिलाहरूले आफूलाई सुधार्दै समाजको नेतृत्व गर्ने कुरामा सचेत हुन समेत अनुरोध गर्नुभयो ।  गाउँपालिकाको १ लाख रुपैयाँ आर्थिक सहयोग तथा महिला बालबालिका शाखा माप्य दुधकोशी गाउँपालिकाको प्राविधिक सहयोगमा आयोजित कार्यक्रममा लोक  गायन प्रतियोगिता तर्फ ९ टिम र बक्तृत्वकला प्रतियोगिता तर्फ ५ टिमको सहभागिता रहेको संवाददाता देवी प्रसाद घिमिरेले बताउनुभयो ।

 विश्वभरि विभिन्न क्षेत्रमा कार्यरत महिलाको आर्थिक, राजनीतिक र सामाजिक उपलब्धि स्मरण गर्दै महिलाको प्रविधिमा पहुँचको विस्तार गर्ने, महिला सशक्तीकरण अभिवृद्धि गर्ने, लैङ्गिक असमानता र हिंसाजन्य क्रियाकलाप निर्मूल गर्ने यस दिवसले लक्ष्य राखेको छ । यस्तै महिलालाई शिक्षित र आत्मनिर्भर बनाउने एवम् उचित सम्मान गर्नेलगायतका उद्देश्य पनि यस दिवसको रहेको छ ।

नेपालको संविधानले कुनै पनि धर्म, संस्कृति, संस्कार, प्रथा, परम्परा, प्रचलन वा अन्य कुनै पनि आधारमा हुने सबै प्रकारका विभेद, शोषण र अन्यायको अन्त्य गरी सभ्य र समतामूलक समाजको निर्माण गर्ने नीति लिएको छ । यस्तै महिलाको हक मौलिक हकका रूपमा स्थापित गरेको छ । समानुपातिक समावेशी सिद्धान्तका आधारमा राज्यको राजनीतिक तथा प्रशासनिक जीवनमा अर्थपूर्ण रूपमा महिलाको सहभागिता बढ्दै गएको छ ।