११५ औं अन्तराष्ट्रिय नारी दिवस नेचसल्यामा पनि विभिन्न कार्यक्रम गरि मनाइयो

फागुन २५, सोलुखुम्बु । सोलुखुम्बुको नेचासल्यान गाउँपालिकामा ११५ औं अन्तराष्ट्रिय नारी दिवस विभिन्न कार्यक्रम गरी मनाईएको छ । ‘सबै महिला तथा बालिकाका लागि : अधिकार, समानता र सशक्तिकरण’ भन्ने मूल नारा साथ दिवस मनाइएको हो । गाउँपालिकाको ५ वटै वडाममा विभिन्न कार्यक्रम गरी दिवस मनाईएको सहकर्मी सोभित ढुंगेलले जानकारी दिनुभयो । दिवसको अवसरमा संस्कृतिक नृत्य खुल्ला प्रतियोगिता, लगायत अन्य विभिन्न कार्यक्रमहरु समावेश गरिएको थियो ।

पाँच वटै वडामा आयोजित दिवसको गाउँपालिकाकी उपाध्यक्ष विना राईले सम्बोधन गर्नुभएको थियो । विश्वभरि विभिन्न क्षेत्रमा कार्यरत महिलाको आर्थिक, राजनीतिक र सामाजिक उपलब्धि स्मरण गर्दै महिलाको प्रविधिमा पहुँचको विस्तार गर्ने, महिला सशक्तिकरण अभिवृद्धि गर्ने, लैङ्गिक असमानता र हिंसाजन्य क्रियाकलाप निर्मूल गर्ने यस दिवसले लक्ष्य राखेको छ । यस्तै महिलालाई शिक्षित र आत्मनिर्भर बनाउने एवम् उचित सम्मान गर्नेलगायतका उद्देश्य पनि यस दिवसको रहेको छ ।

नेपालको संविधानले कुनै पनि धर्म, संस्कृति, संस्कार, प्रथा, परम्परा, प्रचलन वा अन्य कुनै पनि आधारमा हुने सबै प्रकारका विभेद, शोषण र अन्यायको अन्त्य गरी सभ्य र समतामूलक समाजको निर्माण गर्ने नीति लिएको छ । यस्तै महिलाको हक मौलिक हकका रूपमा स्थापित गरेको छ । समानुपातिक समावेशी सिद्धान्तका आधारमा राज्यको राजनीतिक तथा प्रशासनिक जीवनमा अर्थपूर्ण रूपमा महिलाको सहभागिता बढ्दै गएको छ ।