नेपाली सेनाले उपभोग गर्दै आएको सल्लेरीको बाटो खुल्यो

फागुन २९, सोलुखुम्बु । बिगत लामो समयदेखि नेपाली सेनाले उपभोग गर्दै आएको आवाडाँडाबाट तिनकुने हुँदै माथिल्लो क्षेत्र जाने बाटो खोलिएको छ । सोलुखुम्बुको सोलुदुधकुण्ड नगरपालिका ५ सल्लेरीमा तिनकुने क्षेत्रबाट कारागार, गुम्बा क्षेत्र, जिमी राई उत्थान समाज, क्याम्पस लगायतका क्षेत्रमा सवारी साधन आवतजावतका लागि सडक खोलिएको हो ।

सो क्षेत्रमा सडक विस्तारका लागि नेपाल सरकारका रक्षा मन्त्री एवं सोलुखुम्बुबाट प्रतिनिधि सभा सदस्य निर्वाचित मानवीर राईको पहलमा संचालनमा आएको हो । मन्त्री राईले पटक पटक नेपाली सेनाका प्रधानसेनापति तथा अन्य सम्बन्धित क्षेत्रमा सम्वाद गर्दै स्थानियको आवश्यक्तालाई मध्यनजर गरी तत्कालै बाटो खोल्न प्रयास थालेका थिए । हाललाई एम्बुलेन्स, जिप, मोटरसाईकल जस्ता हलुका सवारी साधन मात्र संचालनका लागि बाटो खोल्ने सहमति भएको पनि रक्षा मन्त्री मानवीर राईले जानकारी दिनुभयो ।

उक्त क्षेत्रमा पहिरो तथा जमिन भासिने समस्या समेत रहेकाले यसअघि बैकल्पिक रुपमा व्यक्तिगत जग्गाबाट सडक बनाई प्रयोगमा ल्याईएको थियो । सडक खोल्नका लागि स्थानियबासीले जनश्रमदान गरेका छन् । जमिन भासिने भएकाले डोजर तथा जेसिबी जस्ता उपकरण नगरी स्थानियहरुबाट नै बाटो खोल्ने कार्य गरिएको स्थानिय रामसंघर्ष किराँतीले जानकारी दिनुभयो ।