अव्यवस्थित तार टागिएको भन्दै काँगेलले विद्युत प्राधिकरणलाई बुझायो ध्यानाकर्षण पत्र

फागुन २९, सोलुखुम्बु । सोलुखुम्बुको थुलुङ दुधकोशी गाउँपालिका २ काँगेलले नेपाल विद्युत प्राधिकरण वितरण केन्द्रलाई ध्यानाकर्षण पत्र बुझाएको छ । बुधबार प्राधिकरणले जभाभावी रुपमा तार टागिएको भन्दै ध्यानाकर्षण पत्र बुझाएको हो ।

गाउँपालिकाको वडा नम्बर १ र २ मा प्राधिकरणले वितरण गरेको सोलुखोला संरचनामा लाईन विस्तार गरिएको कुलो, बाधको संरचना अव्यवस्थित भएका तथा सो स्थानमा टागिएको तारहरुले रुखहरु छोएको तथा दुर्घटनाको जोखिम बढेको भन्दै ध्यानाकर्षण पत्र बुझाइएको काँगेलका कार्य बहाक वडा अध्यक्ष नविन बस्नेतले बताउनुभयो ।

जभाभावी रुपमा टागिएको तारले मानिस तथा जनावरहरुको समेत ज्यान जान सक्ने खतरा देखिएकोले प्राधिकरणले यथाशिघ्र अनुगमन गरेर व्यवस्थापन गर्नु पर्ने ध्यानाकर्षण पत्रमा उल्लेख गरिएको छ । साथै कुनै अप्रिय घटना घटेमा कार्यालय स्वयम् जिम्मेवारी हुनु पर्ने र उक्त कार्यका लागि वेवास्था गरेमा काँगेल वडाका उपभोक्ताहरुबाट चरणबद्ध आन्दोलमा उत्रिने समेत चेतावनी दिइएको छ ।

यता नेपाल विद्युत प्राधिकरण सोलुखुम्बुका निमित्त कार्यालय प्रमुख अर्जुन दाहालले पुरानो काठको ठाउँमा नयाँ पोल फेर्न प्राधिकरणसँग बजेट तत्काल नभएकाले बजेटको व्यवस्था भए पछि नयाँ पोल फेर्ने उल्लेख गर्नुभयो ।