फागुन २९, सोलुखुम्बु । आउँदो चैत ७ देखि १९ गतेसम्म हुने २०८१ को एसईई परीक्षामा कोशी प्रदेशबाट ८० हजार बढी विद्यार्थी सहभागी हुने भएका छन् । एसईईका लागि कोशी प्रदेशका १४ जिल्लामा ३७१ वटा परीक्षा केन्द्र तोकिएको कोशी प्रदेश शिक्षा निर्देशनालयले जनाएको छ ।
निर्देशनालयले परीक्षा सञ्चालन तथा व्यवस्थापनका बिषयमा बुधबार विराटनगरमा पत्रकार सम्मेलनमार्फत परीक्षाको तयारीबारे जानकारी गराएको हो । निर्देशनालयका निर्देशक कृष्णप्रसाद पोखरेलका अनुसार साधारण धारतर्फ नियमित ६९ हजार ५०६ जना र ग्रेडबृद्धितर्फ ८ हजार ४५१ विद्यार्थी सहभागी हुँदैछन् ।
त्यसैगरी प्राविधिक धारतर्फ नियमित २ हजार ७११ र ग्रेडबृद्धितर्फ २६६ र खुल्ला धारतर्फ नियमित ३९६ र ग्रेडबृद्धितर्फ ३० जना गरी कुल ८० हजार ९३४ जना विद्यार्थीले एसईई परीक्षामा सहभागी हुने जनाइएको छ । जसमध्ये मोरङमा १८ हजार १०७, झापामा १७ हजार २८ र सुनसरीमा १३ हजार ५८३ विद्यार्थी परीक्षामा सहभागी हुने जनाइएको छ ।
उदयपुरमा ५ हजार ८८१, इलामबाट ४ हजार २३१, खोटाङबाट ३ हजार ८०९, संखुवासभाबाट ३ हजार १२०, धनकुटाबाट २ हजार ५३५, भोजपुरबाट २ हजार ४९२, ओखलढुंगामा २ हजार २२०, ताप्लेजुङमा २ हजार २७२, पाँचथरमा २ हजार ८०६, तेह्रथुमबाट १ हजार १९० र सोलुखुम्बुबाट १ हजार ६६० जना विद्यार्थीले एसईर्ई परीक्षा दिने निर्देशनालयले जनाएको छ ।
परीक्षाका लागि सवैभन्दा बढी ७० वटा परीक्षा केन्द्र मोरङमा रहेका छन् । त्यस्तै झापामा ५७ र सुनसरीमा ५० वटा केन्द्र तोकिएको निर्देशक पोखरेलले जानकारी दिए । उनले परीक्षा केन्द्र रहेको विद्यालयकै प्रधानाध्यापकलाई केन्द्राध्यक्ष तोकिने व्यवस्था भएका कारण परीक्षा मर्यादित रुपमा सम्पन्न हुने बताए ।
परीक्षा सञ्चालनका लागि केन्द्राध्यक्ष, सहायक केन्द्राध्यक्ष, निरीक्षक, परीक्षा सहायक, सहयोगी कर्मचारीसहित ७ हजार ३८५ जना कर्मचारी परिचालित हुने जनाइएको छ । परीक्षाको सुरक्षाका लागि ५ हजार ५६५ जना सुरक्षाकर्मी परिचालन हुने निर्देशक पोखरेलले बताए ।
Discussion about this post