चैत्र ४, सोलुखुम्बु । हिमाली जिल्ला सोलुखुम्बुमा रेडपाण्डा संरक्षणमा भइरहेको काम र आगामी वर्षको कार्ययोजनाको विषयमा छलफल तथा अन्तरकृया सम्पन्न भएको छ । जिल्लामा रेडपान्डा संरक्षणमा भइरहेका कामको विषयमा र सन २०२५ मा हुने कामहरूको विषयमा हिमाली स्वास्थ्य र वातावरणीय सेवा सोलुखुम्बुले सदरमुकाम सल्लेरीमा एक गोष्ठीको आयोजना गरि जानकारी गराएको हो ।
कार्यक्रममा जिल्लाका हाल ४ वटा पालिकामा रेडपाण्डा संरक्षणका लागी विभिन्न कार्यक्रमहरू सञ्चालन भइरहेको जनाइएको छ । रेडपाण्डाको सम्भावित वासस्थान भएका पालिकाहरू लिखुपिके, सोलुदुधकुण्ड, महाकुलुङ र सोताङ गाउँपालिकालाई सम्भावित वासस्थान मानेर हाल विभिन्न जनचेतनामुलक कार्यक्रमका साथै रेडपाण्डा संरक्षणका लागी वातावरण संरक्षण र संवर्द्धनका काम भइरहेको जनाइएको हो ।
सल्लेरीमा आयोजित रेडपाण्डा संरक्षणमा भइरहेका गतिसवधीको जानकारी विषयक कार्यक्रममा रेडपाण्डा नेटवर्कका कार्यक्रम अधिकृत अनिस ढकालले जिल्लाका ४ वटा पालिकामा रेडपाण्डा संरक्षणका लागी भइरहेका कार्यक्रमहरू जस्तै विद्यालयहरूमा चेतनामूलक कार्यक्रम सञ्चालन, पानीको मुहान संरक्षण, वृक्षारोपण जस्ता कामहरू ५ वटा सामुदायिक वनहरुमा भइरहेको जानकार गिराउनुभएको थियो ।
उक्त कार्यक्रममा जिल्लास्थित सरकारी कार्यालयका प्रमुख प्रमुख जिल्ला अधिकारी अनोज कुमार घिमिरे, जिल्ला प्रहरी कार्यालय सोलुखुम्बुका प्रमुख डीएसपी द्वारीका प्रसाद घिमिरे, डिभिजन वन कार्यालयका प्रमुख लगायत हिमाली स्वास्थ्य र वातावरणीय सेवा सोलुखुम्बुका अध्यक्ष ङिमा तेण्डुप शेर्पा सरोकारवालाहरूको उपस्थिति रहेको थियो । सोलुखुम्बुमा वार्षिक ६३ लाख रुपैयाँको कार्यक्रम हिमाली स्वास्थ्य र वातावरणीय सेवा सोलुखुम्बुले कार्यान्वयन गरिरहेको छ ।
Discussion about this post