चैत्र ६, सोलुखुम्बु । सोलुखुम्बुबाट शिक्षक सेवा आयोगको प्राथमिक तह तृतीय श्रेणीको खुल्ला प्रतियोगितात्मक परीक्षामा नाम निकाल्न सफल शिक्षकहरूलाई स्थायी नियुक्ति पत्र वितरण तथा शपथ ग्रहण गराईएको छ । बुधवार शिक्षा विकास तथा समन्वय इकाई सोलुखुम्बुले एक औपचारीक कार्यक्रम आयोजना गरी १ सय ४ जना शिक्षकहरुलाई स्थायी नियुक्ति पत्र वितरण तथा शपथ ग्रहण गराइएको हो ।
शिक्षा तथा मानव स्रोत विकास केन्द्रको फागुन २६ गते गरेको सिफारिस अनुसार शिक्षा नियमावली २०५९ (संशोधन सहित) को नियम ९५ र ९६ (१) बमोजिमको अवधि परीक्षण कालमा रहने गरी विद्यालयमा हाजिर भएको मिति देखि तलब भत्ता एवंम अन्य सुविधा पाउने गरी जिल्लाको विभिन्न स्थानीय तह अन्तर्गतका विद्यालयमा पदस्थापन हुने गरी स्थायी नियुक्ति गरिएको जनाइएको छ । नियुक्ति पत्र लिनेहरुमासोलुदुधकुण्ड नगरपालिकामा १८ जना, लिखुपिके गाउँपालिकामा १४ जना सोताङ गाउँपालिकामा ५ जना र खुम्बु पासाङल्हामु गाउँपालिकामा १३ जना शिक्षक स्थायी पदमा नियुक्ति भएका छन ।
यस्तै माप्यदुधकोशी गाउँपालिकामा १९ जना, नेचासल्यान गाउँपालिकामा ७ जना, महाकुलुङ गाउँपालिकामा ३ जना र थुलुङ दुधकोशी गाउँपालिकामा २५ जना गरी १ सय ४ जना शिक्षकलाई नियुक्ति पत्र प्रदान गरिएको शिक्षा विकास तथा समन्वय इकाई सोलुखुम्बुका सूचना अधिकारी प्रकाण्ड न्यौपानेले जानकारी दिनुभयो ।
नियुक्ति पत्र वितरण कार्यक्रममा बोल्दै जिल्ला समन्वय समिति सोलुखुम्बुका प्रमुख कृष्णप्रसाद निरौलाले इमान्दार, कर्तव्यनिष्ठ र नैतिकताको आदर्शले प्रेरित भई अध्यापन कार्य गर्नुका साथै आफुलाई सुम्पिएको जिम्मेवारी प्रचलित कानुन बमोजिम बहन गर्नु आग्रह गर्नुभएको छ ।
यस्तै प्रमुख जिल्ला अधिकारी अनोज कुमार घिमिरेले बालबालिकाहरूको भविष्य सुनिश्चित गर्न र देशको शैक्षिक अवस्था परिवर्तन गर्न शिक्षकहरूको महत्त्वपूर्ण भूमिका हुने भएकाले शिक्षकहरूले आफ्नो कर्तव्य र दायित्व निर्वाह गर्न सुझाव दिनुभयो । यस्तै शिक्षा विकास तथा समन्वय इकाई सोलुखुम्बुका प्रमुख पुण्य राज डङ्गोलले नियुक्ति भएका शिक्षकहरूलाई इमानदारीताका साथ काम गर्न अनुरोध गर्नुभयो ।
नियुक्ति भएका शिक्षकहरुका लागि शिक्षा सम्बन्धी बिहिबार र बुधबार तालिमको व्यवस्था गरिएको उल्लेख गर्नुभयो । उक्त कार्यक्रममा विभिन्न संघ संस्थाका प्रतिनिधी, सुरक्षाकर्मी, संचारकर्मी लगायतको उपस्थिती रहेको थियो ।
Discussion about this post