उदयपुर सहित तीन जिल्लाबाट प्रतिबन्धित लागुऔषध सहित ४ जना पक्राउ

चैत्र ११, सोलुखुम्बु । उदयपुर, झापा र मोरङमा प्रहरीले विशेष अभियान सञ्चालन गर्दै प्रतिबन्धित लागुऔषधसहित चार जनालाई पक्राउ गरेको छ। विभिन्न स्थानबाट खटिएको प्रहरी टोलीले ब्राउनसुगर, गाँजा र प्रतिबन्धित औषधिसहित उनीहरूलाई नियन्त्रणमा लिएको हो।

इलाका प्रहरी कार्यालय झिलझिले झापाबाट खटिएको टोलीले झापा गौरिगञ्ज गाउँपालिका–१ भन्सार चोकमा भारतबाट नेपाल आउँदै गरेका भारतको किसानगन्ज–२ का २३ वर्षीय सलमलाई ४ ग्राम ५५ मिलिग्राम ब्राउनसुगरसहित पक्राउ गरेको छ।

त्यसैगरी, इलाका प्रहरी कार्यालय रानी मोरङ र लागुऔषध नियन्त्रण ब्यूरो विराटनगरको टोलीले विराटनगर महानगरपालिका–१५ बाट २ ग्राम ४७ मिलिग्राम ब्राउनसुगरसहित मोरङ केराबारी गाउँपालिका–७ का २३ वर्षीय सनम राई र २७ वर्षीय रुपेश तामाङलाई पक्राउ गरेको छ।

उदयपुरमा पनि प्रहरीले लागुऔषधविरुद्धको कारबाही जारी राख्दै त्रियुगा नगरपालिका–१ खैजनपुरबाट २२ वर्षीय सन्तोष चौधरीलाई ७ एम्पुल प्रतिबन्धित औषधि र २५ ग्राम गाँजासहित पक्राउ गरेको छ। पक्राउ परेकाहरूलाई आवश्यक कानुनी प्रक्रिया अघि बढाइने प्रहरीले जनाएको छ।