नवउदय टोल विकास संस्थाको नवौँ साधारण सभा सम्पन्न

असोज १८, सोलुखुम्बु । उदयपुरको त्रियुगा नगरपालिका–१० स्थित नवउदय टोल विकास संस्थाको नवौँ वार्षिक साधारण सभा आइतबार सम्पन्न भएको छ । संस्थाकी अध्यक्ष सशिकला परियारको अध्यक्षतामा आयोजित साधारण सभाको उद्घाटन प्रमुख अतिथि एवम् त्रियुगा नगरपालिका–१० का वडाध्यक्ष किरण पाण्डेले गर्नुभएको थियो । कार्यक्रमलाई सम्बोधन गर्दै वडाध्यक्ष पाण्डेले समाज विकासका लागि टोल विकास संस्थाहरूको सक्रियता अपरिहार्य रहेको बताउनुभयो ।

उहाँले स्थानीय तहमा बालमैत्री शासन प्रवद्र्धन गर्न टोलस्तरबाटै सहयोग र समन्वय हुनुपर्नेमा जोड दिनुभयो।साधारण सभामा संस्थाका सचिव जितबहादुर भुजेलले वार्षिक प्रगति प्रतिवेदन तथा कोषाध्यक्ष गेशबहादुर आलेमगरले आर्थिक वर्ष २०८२÷०८३ को आर्थिक प्रतिवेदन प्रस्तुत गर्नुभएको थियो । प्रस्तुत आर्थिक प्रतिवेदन अनुसार संस्थाले समीक्षा अवधिमा ऋण लगानीको ब्याज तथा सदस्यता प्रवेश शुल्क गरी कुल १ लाख २४ हजार ४७८ रुपैयाँ आम्दानी गरेको छ । यसैगरी बचतकर्ताको ब्याज, मसलन्द, बिरामी सहयोग, घरभाडा तथा समवेदना खर्च शीर्षकमा ६९ हजार ४२५ रुपैयाँ खर्च भई ५५ हजार ०५३ रुपैयाँ बचत (मौज्दात) रहेको उल्लेख छ ।

सो अवसरमा ८९ वर्षीय ज्येष्ठ नागरिक कुल बहादुर थापालाई सम्मान गरिएको थियो । वडा अध्यक्ष पाण्डेले उहाँलाई दोसल्ला ओढाएर सम्मान व्यक्त गर्नुभएको थियो । कार्यक्रममा संस्थाकी उपाध्यक्ष रुकमणि राउतले स्वागत मन्तव्य तथा अतिथिलाई खादा–अविरद्वारा सम्मान गर्नुभएको थियो भने कार्यक्रमको सञ्चालन सचिव जितबहादुर भुजेलले गर्नुभएको थियो ।

कार्यक्रममा त्रियुगा साना सहरी खानेपानी विकास समितिका सचिव सन्तोष खड्का तथा संस्थाका पदाधिकारी, सल्लाहकार र स्थानीय टोलवासीको बाक्लो उपस्थिति रहेको थियो । साधारण सभाकै अवसरमा टोलस्तरीय बालक्लब गठन गरिनुका साथै अधुरो रहेको घलेटोल पुछारको सडक निर्माणलाई पूर्णता दिन कृष्ण बहादुर मगरको अध्यक्षतामा ‘उत्रेटोल ग्रामीण सडक निर्माण उपभोक्ता समिति’ समेत गठन गरिएको छ । संस्थाले आगामी कार्यदिशाका रूपमा टोलको सरसफाइ, विपद् तथा जोखिम व्यवस्थापन, सुरक्षित वातावरण निर्माण, महिला तथा बालबालिकालाई सहयोग र संस्थागत सुधारलाई प्राथमिकतामा राखेर काम गर्ने लक्ष्य लिएको छ ।