रगतसँग साटेको संघीय लोकतान्त्रिक गणतन्त्रको विकल्प छैन : राष्ट्रपति पौडेल

राष्ट्रपति रामचन्द्र पौडेलले संघीय लोकतान्त्रिक गणतन्त्र नेपाली जनताले रगतसँग साटेको उपलब्धी भएको भन्दै यसको विकल्प सोच्न नसकिने बताएका छन् । सोलुखुम्बुको नेचासल्यान गाउँपालिकाको नवनिर्मित प्रशासकीय भवन उद्घाटन समारोहलाई सम्बोधन गर्दै राष्ट्रपति पौडेलले बर्तमान ब्यवस्थामा हरेक नागरिक मालिक हुन पाउने भन्दै यसको सदृढिकरणमा सबैले जोड दिनुपर्ने बताए ।
पालिका भवनको उद्घाटन गर्दै राष्ट्रपति पौडेलले रैती दुनियाँबाट सार्वभौम नागरिक हुन भन्दै शासनमा बसेर खराब गर्नेलाई दण्डित गर्ने अधिकार नागरिकलाई यही व्यवस्थाले दिएको बताए । ‘शासन व्यवस्थालाई सुदृढ बनाउन र यही व्यवस्थाबाट नेपाली जनताको भाग्य र भविष्य सुनिश्चित छ भन्ने महशुस गराउनुपर्ने दायित्व सरकार, राजनीतिक दललगायत हामी सबैको हो ।’ उनले भने ।

उनले स्वतन्त्रता र शासन प्रणाली समयको माग र जनताको चाहना भएको बताउँदै नेपाली जनतालाई आफूले बनाएको संविधान बाहिरका कुनै पनि निरंकुशता र अराजकता स्वीकार्य नहुने बताए । राष्ट्रपति पौडेलले थपे– ‘इतिहास साक्षी छ कि १०४ वर्षीय जहानीयाँ राणा शासन होस् कि ३० वर्षे पञ्चायत वा सक्रिय राजतन्त्र नेपाली जनताले कुनै पनि निरंकुशताका नाम र अवशेषलाई रुचाएनन् । संघीय लोकतान्त्रिक गणतन्त्र हामीले त्यसै प्राप्त गरेका होइनौ । यो हजारौंको त्याग, संघर्ष र बलिदानबाट प्राप्त उपलब्धी हो ।’
राष्ट्रपति पौडेलले क्षेत्रमा सभामुख हुँदा पैदल यात्रा गर्दे यस ठाँउमा र पूर्वी पहाडका डाँडाकाँडा पुगेको र जनतासँग साक्षात्कार गरेको स्मरण गरे । राष्ट्रपति पौडेलले देशको युवा जनशक्ति विदेश पलायन हुने प्रवृत्ति रोक्न जरुरी रहेको उल्लेख गर्दै यसका लागि उचित शिक्षा, स्वास्थ्यको प्रवन्ध, उद्योगधन्दाको विकास, उत्पादनमा बृद्धि, चुस्तदुरुस्त सेवा प्रवाह, गाउँंमै रोजगारी र आम्दानीको व्यवस्थाको लागि जनता केन्द्रित नीति तथा कार्यक्रम र बजेट तर्जुमा गर्नुपर्ने बताए ।
राष्ट्रपति पौडेलले राजधानी र मधेशबाट सर्वोच्च शिखर सगरमाथाको काख अब धेरै टाढा नभएको देख्दा आफू अत्यन्तै खुशी भएको भन्दै अपर सगरमाथा मार्ग निर्माणका लागि भएका पहल र आफूले गरेको संघर्षको स्मरण गरे ।
कार्यक्रममा रक्षा मन्त्रि मानबीर राईले गणतन्त्र विरुद्ध हुने गतिविधि जनताको लागि स्विकार्य नहुने बताए । उनले जिल्लाको बृहत्तर विकासका लागि आफुले सक्दो पहल गरिरहेको बताए । सो क्रममा पुर्व मन्त्रि तथा संविधा सभा सदस्य बलबहादुुर केसीले गणतन्त्रको पक्षमा जनलहर ब्यापक देखिएको भन्दै स्थानीय सरकारले सेवा प्रवाह र विकास निर्माणको काममा उल्लेख्य भूमिका निर्वाह गरेको बताए । पालिका अध्यक्ष धनजन राईले पालिका, जिल्ला समन्वय समिति र संघिय सरकारको समेत त्रिपक्षिय लगानीमा पालिकाको प्रशासनिक भवन निर्माणको काम सकिएको बताए । पालिका उपाध्यक्ष विना राईले सिमित श्रोत साधनका बाबजुद पनि लोककल्याणकारी क्षेत्रमा काम गरिरहेको भन्दै वर्तमान ब्यवस्थालाई थप मजबुद बनाउन स्थानीय सरकारलाई दरिलो बनाउनु पर्ने बताईन् ।