प्रधान न्यायाधीश सिंह राउतद्वारा नवनिर्मित ओखलढुंगा जिल्ला अदालत भवनको उद्घाटन

चैत्र ११, सोलुखुम्बु । ओखलढुगां जिल्ला अदालतको नवनिर्मित भवन प्रधान न्यायाधीश प्रकाशमान सिंह राउतले उद्घाटन गर्नुभएको छ । २०७९ असार १९ गते ठेक्का सम्झौता भई निर्माण कार्य सुरु भएको ३२ महिनामा निर्माण गरिएको भवनको प्रधान न्यायाधीश सिंह राउतले आज उद्घाटन गर्नुभएको हो ।

एसकेआई स्लेट चन्द्रज्योति जे.भीले मूल्य अधिवृद्धि कर बाहेक १९ करोड ६४ लाख १८ हजार ३२८ रुपियाँ चार पैसा लागतमा उक्त भवन निर्माण गरिएको अदालतले जनाएको छ । ओखलढुङ्गा सदरमुकामको गोरुमारेभञ्ज्याङ नजिकै सिद्धिचरण नगरपालिका–११ मा अदालतको सुविधा सम्पन्न भवन बनेको छ ।

अदालतको लागि सुविधा सम्पन्न मुख्य कार्यालय सँगै इजलास, न्यायाधीश, कर्मचारी र सुरक्षाकर्मीका लागि आवास गृहको व्यवस्था छ । अदालतको मुख्य भवन पाँच तले र पक्की बनाइएको छ । खानेपानी, शौचालय र प्रतीक्षालयको राम्रो व्यवस्था गरिएको छ । भवनको उदघाटन गर्दै प्रधान न्यायाधीश प्रकाशमान सिंह राउतले आफ्नै भवन भएपछि न्याय क्षेत्रमा नागरिकका लागि सहज वातावरण बन्ने विश्वास व्यक्त गर्नुभयो ।

उहाँले हरेक नेपाली न्यायको पक्षमा भइरहने हुँदा न्याय पाउने स्थान नागरिकको सहज पहुँचमा रहनुपर्ने उल्लेख गर्नुभयो । यसअघि भएको अदालतको पुरानो भवनबाट सेवा प्रवाह गर्न भौतिक रुपमा कठिनाइ रहेकोले नयाँ भवनमा कर्मचारीलाई कार्य सम्पादन गर्न र सेवाग्राहीलाई सेवा लिन सहज भएको छ ।