सगरमाथा पर्यटन सडकको कालोपत्रे शिलान्यास, एडिवि सहितको ३७ करोड लगानीमा रिङ्मुसम्म सडक पिच हुने

चैत्र १२, सोलुखुम्बु । फाप्लुबाट टाक्सिन्दु हुँदै खुम्बु जोड्ने सगरमाथा पर्यटन सडकको कालोपत्रेको काम शुरुवात भएको छ । एसियाली विकास बैंकको सहयोगमा कोशी प्रदेशको भौतिक पुर्वाधार विकास मन्त्रालय अन्तर्गतको ग्रामिण सडक सन्जाल सुधार आयोजना मार्फत कार्यान्वयन हुने गरि सडक कालोपत्रेको काम शुरु भएको हो । ३७ करोड २८ लाख ७६ हजार ७ सय ६० रुपैँयाको लागतमा बन्ने उक्त सडकको मंगलबार एक कार्यक्रमका विच शिलान्यास गरिएको हो ।

फाप्लु स्थित जेरो प्वाईण्टमा आयोजित एक कार्यक्रममा नेपाली काँग्रेसका पर्यटन विभाग प्रमुख तथा केन्द्रिय सदस्य आङगेलु शेर्पा र सोलुदुधकुण्ड नगरपालिकाका मेयर नाम्गेलजाङबु शेर्पाले संयुक्त रुपमा शिलान्यास गरेका हुन् । फाप्लुबाट टाक्सिन्दुको रिङ्मु नजिक सम्म करिब १० किलोमिटर सडकको कालो पत्रे २ बर्ष भित्र गर्ने गरि बानियाँ निर्माण सेवा हेटौँडाले ठेक्का सम्झौता गरेको हो ।

खुम्बु क्षेत्र जोड्ने रणनितिक सडकको कालोपत्रे शिलान्यास कार्यक्रममा बोल्दै काँग्रेस केन्द्रिय सदस्य आङगेलु शेर्पाले यो सडकले पर्यटन र अर्थतन्त्रमा महत्वपूर्ण टेवा पुग्ने भन्दै निर्माण कार्यमा सहयोग गर्न स्थानीयलाई आग्रह गर्नु भयो । त्यस्तै सोलुदुधकुण्ड नगरपालिकाका मेयर नाम्गेलजाङ्बु शेर्पाले आफ्नो पहलमा एडिबि बाट ३८ करोड बजेट ल्याउन सफल भएको भन्दै यो सडकले खुम्बुका अतिरिक्त दुधकुण्ड जान पनि धेरै सहज हुने बताउनु भयो ।

निर्माण कम्पनीका प्रतिनिधि उद्धब न्यौपानेले अबको २ बर्ष भित्र कालोपत्रेको काम सक्ने गरि काम शुरु गरेको जानकारी दिनुभयो । वडा नम्बर ४ का अध्यक्ष युवास तामाङको अध्यक्षतामा भएको कार्यक्रममा नगरपालिकाकी उपमेयर गान्धिमाया तामाङ, नगर प्रबक्ता फुर्वा ग्याल्जेन शेर्पा, १ नम्बर वडा अध्यक्ष छोङ्बा शेर्पा, खुम्बुपासाङल्हमु वडा नम्बर १ का अध्यक्ष फुनुरु शेर्पा, टानका बरिष्ठ उपाध्यक्ष कर्मा शेर्पा र काँग्रेस नेता दावागेलु पाख्रिन लगायतले शुभकामना दिएका थिए । सडकको ठेक्का सम्झौता गत मंसिर १७ गते भएको हो ।