प्रदेशले दिने संरचनागत सुधारको बजेट कम भएको जिसस महासंघ कोशीको निष्कर्ष

चैत्र १२, सोलुखुम्बु । जिल्ला समन्वय समिति महासङ्घ कोशी प्रदेशको ७ औँ बैठकले जिल्ला समन्वय समितिहरूको संरचनागत सुधारका लागी विनियोजित बजेट जिल्ला समन्वय समितिहरूको आवश्यकता अनुसार नभएको निष्कर्ष निकालेको छ ।  मङ्गलबार सोलुखुम्बुको सेलगुडीमा बसेको बैठकले प्रदेशले जिल्ला समन्वय समितिलाई विनियोजन गर्ने संरचनागत सुधारको बजेट पर्याप्त नभएको निष्कर्ष निकाल्दै शीर्षक परिवर्तन गरेर बजेट निकासा गर्न माग गर्ने निर्णय गरेका हो ।

 यस्तै समन्वय प्रमुखहरुको बैठकले संविधान संशोधनको चर्चा चलिरहेका बेला संविधान संशोधनमा जिल्ला समन्वय समितिलाई कामयाबी बनाउने किसिमका सुझावहरू पेश गर्ने निर्णय गरेको छ । बैठकमा कोशी प्रदेशका जिल्ला समन्वय समितिका लागी आइटि अफिसर आवश्यक परेकाले दरबन्दी माग गर्ने, महासङ्घको अर्को बैठक उदयपुरमा बस्ने, जलवायु परिवर्तन फोकस सम्मेलन आयोजना गर्ने, ओखलढुङ्गाका आधारभूत तहको बढी भएका दरबन्दीलाई निमावि र मावि तहमा  मिलान गर्न सरकारसँग माग गर्ने, जिल्ला उद्योग प्रबर्द्धन कार्यक्रम सञ्चालन गर्न कोशी प्रदेश सँग बजेट माग गर्ने लगायत निर्णय गरेको छ ।  

बैठक जिल्ला समन्वय समिति भोजपुरका प्रमुख तथा जिसस महासङ्घ कोशीका अध्यक्ष कमल थुलुङको अध्यक्षता, जिल्ला समन्वय समिति खोटाङका प्रमुख तथा जिसस महासङ्घ केन्द्रिय कोषाध्यक्ष सन बहादुर राईको प्रमुख आतिथ्यतामा सम्पन्न भएको हो ।  बैठकमा प्रदेशका १४ मध्ये ११ जिल्लाका  जिसस प्रमुख तथा उपप्रमुख, सदस्य लगायतकाे उपस्थिति रहेको थियाे  ।