हलेसीमा आँखा शिविर, पहिलो दिन २८ जनाको उपचार

चैत्र १४, सोलुखुम्बु । खोटाङको हलेसीमा निःशुल्क तीन दिने आँखा शिविरको पहिलो दिन २८ जना बिरामीको शल्यक्रिया गरिएको छ । नेपाल नेत्र ज्योति संघ खोटाङ र आँखा उपचार केन्द्र हलेसीको व्यवस्थापन र हलेसी तुवाचुङ नगरपालिकाको आर्थिक सहयोग तथा सरगमाथा चौधरी आँखा अस्पताल लहानको प्राविधिक सहयोगमा सुरु भएको शिविरको पहिलो दिन उक्त संख्याका बिरामीहरुको शल्यक्रिया गरिएको हो ।

बिहीबारदेखि सुरु भएको शिविरमा निशुल्क आँखा जाँच, औषधि वितरण, ज्येष्ठ नागरिकलाई चश्मा वितरण, आँखाको शल्यक्रियापछि कालो चश्मा तथा औषधि वितरण गरिने नेत्र ज्योति संघका प्रमुख इन्द्र कसजुले बताउनुभयो । चैत १६ गतेसम्म चल्ने शिविरका लागि सगरमाथा चौधरी आँखा अस्पताल लाहानका मुख्य शल्यचिकित्सक दिवाकर चौधरी र आँखा तथा कान उपचार केन्द्र हलेसीका प्रमुख सुरेन्द्र श्रेष्ठसहित १६ जना चिकित्सक खटिएका छन्। शिविरको पहिलो दिन १६६ जनाको आँखाको जाँच, २८ जनाको मोतिविन्दुको शल्यक्रिया, ११५ जनालाई औषधि वितरण, १७ जना ज्येष्ठ नागरिकलाई चश्मा वितरण गरिएको छ ।

हलेसी तुवाचुङ नगरपालिकाका उपमेयर रमेश कुमार राउत, नगर प्रवक्ता एवंम् महादेवस्थानका वडाध्यक्ष कमल गिरी लगायतको उपस्थितिमा शिविर उद्घाटन गरिएको थियो । यसअघि, दिक्तेलमा चैत ९, १० र ११ गते सञ्चालन गरिएको शिविरबाट ७०९ जनाकोे आँखाको जाँच, ९९ जना मोतिविन्दुको शल्यक्रिया, ५७० जनालाई औषधि वितरण र २०२ जना ज्येष्ठ नागरिकलाई चश्मा वितरण गरिएको थियो। यस्तै, चैत ४, ५ र ६ गते बाक्सिलामा सञ्चालन गरिएको शिविरमा ४७ जनाको मोतिविन्दुको शल्यक्रिया, ३९२ जनाको आँखा जाँच, ३४ जना ज्येष्ठ नागरिकलाई पावरवाला चश्मा र ३१० जनालाई निशुल्क औषधि वितरण गरिएको थियो।