सोलुमा एसइई दिएका विद्यार्थीलाई व्यावसायिक तालिम प्रदान गरिने

चैत्र १९, सोलुखुम्बु । हिमाली जिल्ला सोलुखुम्बुमा एसइई दिएका विद्यार्थीलाई व्यावसायिक तालिम दिइने भएको छ । सोलु च्यामले सोलुदुधकुण्ड नगरपालिकाको सहकार्यमा माध्यमिक शिक्षा परीक्षा (एसइई) दिएका विद्यार्थीलाई उक्त तालिम दिने भएको हो । नुम्बुर भोकेशनल ट्रेनिङ सेन्टरका अध्यक्ष निमा शेर्पाले एसइईपछि नतिजा नआउँदासम्मको विद्यार्थीहरुको खाली समयमा खेर फाल्न दिनुहुँदैन भन्ने उद्देश्यका साथ तालिम सञ्चालन गर्न लागिएको बताउनुभयो ।

यस्तै तालिमबाट विद्यार्थीहरूको भविष्यलाई अझ उज्जवल बनाउन मदत पुर्याउने हेतुले नुम्बुर भोकेशनल ट्रेनिङ सेन्टरमा तालिम दिइने सोलुदुधकुण्ड नगरपालिकाका मेयर नाम्गेल जाङ्बु शेर्पाले जानकारी दिनुभयो । तालिममा तालिम केन्द्रमा प्लम्बिङ, इलेक्ट्रिकल प्रविधि, होटल तथा रेस्टुरेन्ट कुकिंङ सम्बन्धि, सिकर्मी प्रशिक्षण, पर्वतीय पर्यटन तथा आतिथ्य व्यवस्थापन र पदयात्रा एजेन्सी समावेश गरिने भएको छ । तालिम लिएकालाई रोगजागरीको व्यवस्था समेत गरिने भएकाले इच्छुक विद्यार्थीहरूलाई आवेदनको लागि आह्वान गरिएको छ ।