रुपाटारमा सुरु भयो २ दिने व्यावसायिक पशुपालन तालिम

चैत्र २०, ठबिन्द्र मगर, सोलुखुम्बु । उदयपुरको ताप्ली गाउँपालिका वडा नम्बर ५, रुपाटारमा २ दिने व्यावसायिक पशुपालन तालिम शुरु भएको छ । वडा नम्बर ५ को सभाहलमा जीवन बिकास लघुवित्त वित्तीय संस्था लिमिटेड ताप्ली शाखाको आयोजनामा उक्त तालिम शुरु भएको हो । ताप्लिको हरेक क्षेत्रमा पशुपालनको पनि सम्भावना राम्रै भएकाले यहाँका कृषकहरुलाई पशुपालन तालिमले थप सहयोग मिल्ने र जीवनस्तरमा सहजता ल्याउन मद्दत पुग्ने भएकोले स्थानीय कृषक, वडा र गाउँपालिकाका पशु कार्यकर्ताहरुसँग छलफल गरितालिम संचालन गरिएको जीवन बिकास लघुवित्त वित्तीय संस्थाका शाखा प्रमुख अन्तोष कुमार शाहले बताउनु भएको छ ।

कार्यक्रमको उत्घाटन सत्रमा बोल्दै वडा अध्यक्ष बिष्णु कुमार श्रेष्ठले यस गाउँपालिकाको विभिन्न वडाका सबै क्षेत्रमा पशुपालन गर्न उपयुक्त हावापानी र घाँसहरुको पनि उत्तिकै प्रयाप्ततायुक्त भू–भाग भएकाले कृषकहरुले व्यावसायिक पशुपालन समेत गर्दै आएको उल्लेख गर्नुभयो । यस्तै गाउँपालिकाले कृषि तथा पशुपालन प्रवर्धनमूलक कार्यक्रमका लागि बजेट बिनियोजन गरि अनुदानका कार्यक्रमहरु समेत संचालन गरिरहेको बताउनुभयो । तालिमको आयोजना गरि थप पशुपालन सम्बन्धि प्रबिधिमूलक ज्ञान, सीप प्रदान गर्न सहयोग गर्ने संस्थालाई धन्यवाद समेत व्यक्त गर्नुभयो ।

उक्त जीवन बिकास लाघुबित्त वित्तीय संस्थाका बिभिन्न केन्द्रहरुबाट ३० जना महिला सदस्यहरुको सहभागिता रहेको तालिमको ताप्ली गाउँपालिका पशुसेवा शाखाका नायव प्राविधिक सहायक सुस्मिता खड्काले सहजिकरण गर्नुभएको छ । व्यावसायिक रुपमा पशुपालन गरि कृषकहरुले प्रभावकारी आयआर्जन गरि जीवनस्तर उकास्न गाउँपालिकाले कृषि तथा पशुपालन सम्बन्धि प्रवर्धनात्मक कार्यक्रमहरु कार्यन्वयनमा ल्याउन र कृषकहरुले अनुदान तथा तालिम प्राप्त पछि गरिरहेको पशुपालन कार्यको साझेदारी संस्था, कृषि प्राबिधिकहरुबाट नियमित अनुगमन मुल्यांकन र सल्लाह सुझाव साथै अन्य प्राबिधिक सहयोग पनि उत्तिकै आवश्यक देखिने हुन्छ ।