व्यावसायिक पशुपालन तालिमबाट ताप्लीका ३० जना महिला लाभान्वित

चैत्र २१, सोलुखुम्बु । उदयपुरको ताप्ली गाउँपालिकाका ३० जना महिला पशुपालन तालिमबाट लाभान्वित भएका छन् । वडा नम्बर ५ रुपाटारको सभाहलमा जीवन बिकास लघुवित्त वित्तीय संस्था लिमिटेड ताप्ली शाखाद्धारा संचालित तालिमबाट उक्त संख्याका महिलाहरु लाभान्वित भएका हुन् । ताप्लीको हरेक क्षेत्रमा पशुपालनको पनि सम्भावना राम्रै भएकोले यहाका कृषकहरुलाई पशुपालन तालिमले थप सहयोग मिल्ने र जीवनस्तरमा सहजता ल्याउन मद्दत पुग्ने भएकोले स्थानीय कृषक, वडा र गाउँपालिकाका पशु कार्यकर्ताहरुसँग छलफल गरि यो २ दिने पशुपालन तालिम संचालन गरिएको जीवन बिकास लघुवित्त वित्तीय संस्थाका शाखा प्रमुख अन्तोष कुमार शाहले बताउनु भएको छ ।

समापन कार्यक्रममा बोल्दै वडाध्यक्ष बिष्णु कुमार श्रेष्ठले यस गाउँपालिकाको विभिन्न वडाका सबै क्षेत्रमा पशुपालन गर्न उपयुक्त हावापानी र घाँसहरुको पनि उत्तिकै प्रयाप्तता भएकोले यहाँका कृषकहरुले व्यावसायिक पशुपालन समेत गर्दै आईरहेको बताउनुभयो । त्यसैगरी गाउँपालिकाले कृषि तथा पशुपालन प्रवर्धनमूलक कार्यक्रमका लागि बजेट बिनियोजन गरि अनुदानका कार्यक्रमहरु समेत संचालन गरिरहेको उल्लेख गर्नुभयो । २ दिने तालिमबाट सिकेका पशुपालन गर्ने तरिका, पशुपन्क्षिका जात, बर्ग, पशुमा लाग्ने रोगहरु र रोगबाट बचाउन उपचारात्मक बिधिहरु र घास व्यावस्थापन, गोठ र खोर व्यवस्थापन सम्बन्धी सिपहरुलाई व्यावहारिक रुपमा लागू गर्न साथै छरछिमेकिहरुलाई पनि सहजिकरण गर्न समेत अनुरोध गर्नुभयो ।

तालिममा सहभागिहरुले आफुले सिकेको कुराहरु लागू गर्ने र कुनै समस्या आईपरेको खण्डमा पशु प्राबिधिकहरु सग सहयोग लिने र व्यावसायिक रुपमा पशुपालन गर्न सक्षम हुने प्रतिबद्धता व्यक्त गरेका छन्, भने समयसमयमा पुनर्ताजगी तालिमको लिन आग्रह गरेका छन् । यता जीवन बिकास ताप्ली शाखाका प्रमुख अन्तोष कुमार शाहले जीवन बिकास लघुबित्त बित्तिय संस्थाका सदस्यहरुले व्यावसायिक पशुपालन गरि आयअर्जन बढाउन आर्थिक अभाव भएको खण्डमा संस्थाले प्रवाह गर्ने कर्जा लिएर आफ्नो व्यावसाय अगाडि बढाउन सक्ने बताउनुभयो ।

तालिमपछि सबैको घरघरमा पुगेर ताप्ली गाउँपालिका र जीवन बिकास संस्थाले नियमित अनुगमन गर्नुे उहाँको भनाई छ । तालिममा सकृय सहभागिता जनाएकोमा सम्पुर्ण सहभागिहरुलाई धन्यवाद समेत व्यक्त गर्नुभयो । उक्त तालिमको सहजीकरण ताप्ली गाउँपालिका पशुसेवा शाखाका नायव प्राविधिक सहायक सुस्मिता खड्काले गर्नुभएको थियो ।