खिजीदेम्बाको मैदानेमा श्रमदान मार्फत बौद्ध चैत्य निर्माण

चैत्र २२, सोलुखुम्बु । ओखलढुङ्गाको खिजीदेम्बा गाउँपालिका–९ मैदानेमा श्रमदान मार्फत बौद्ध चैत्य निर्माण गरिएको छ । सहयोगी दाताहरुको आर्थिक तथा श्रमदान मार्फत चैत्य निर्माण गरिएको हो । दाताहरुबाट सङ्कलन भएको ४० लाख, वडा कार्यालय मार्फत ३० हजार बराबरको सहयोग र स्थानिय बासीको श्रमदानले बौद्ध चैत्य बनेको वडा अध्यक्ष तथा निर्माण प्रचार प्रसार विभाग प्रमुख ङवाङ फुरी शेर्पाले बताउनुभयो ।

शेर्पा समुदायको बाक्लो बसोबास रहेको मैदानेमा धार्मिक अनुष्ठानका लागि ३५ फिट अग्लो बौद्ध चैत्य निर्माण गरिएको शेर्पाले जानकारी दिनुभयो । ल्हाबब छर्योतेन (देवातार चैत्य) को बिहिबार प्राण प्रतिष्ठा सहित उद्घाटन गरिएको छ ।

धर्मगुरु महाउपदेय खेन साङ्गे राङ्ज्युङ रिन्पोछे र गाउँपालिका अध्यक्ष गम्बु शेर्पा साथै अन्य लामा गुरुहरुद्वारा चैतयको उद्घाटन गरिएको छ । गत कात्तिकदेखि चैत्यको निर्माण सुरु गरिएको थियो ।