शिक्षक आन्दोलनलाई अनेरास्ववियू (क्रान्तिकारी) सोलुको समर्थन, आज शिक्षकहरूले दिउँसै बत्ती बालेर सरकार खोजे

चैत्र २६, सोलुखुम्बु । शिक्षा विधेयक जारी गर्नुपर्ने लगायतका मागहरु राखेर आन्दोलन गरिरहेका शिक्षकहरुको आन्दोलनलाई अनेरास्ववियू (क्रान्तिकारी) सोलुखुम्बुले समर्थन जनाएको छ । सोमबार एक पत्र जारी गर्दै शिक्षकहरुले गरिरहेका आन्दोलनलाई सरकारले सम्बोधन गर्नु पर्ने भन्दै अनेरास्ववियू क्रान्तिकारीले  ऐक्यबद्धता जनाएको हो ।

अनेरास्ववियू (क्रान्तिकारी) सोलुखुम्बु अध्यक्ष सोनाम शेर्पाद्धारा हस्ताक्षरित पत्रमा गत २० गते देखि नेपाल शिक्षक महासंघको नेतृत्वमा देशभरीका हजारौ शिक्षक, शिक्षिकाहरु र विद्यालयका कर्मचारीहरुले राजधानीमा गरीरहेको न्यायपूर्ण आन्दोलन प्रति अनेरास्ववियू (क्रान्तिकारी) संगठनको गम्भिर ध्यानाकर्षण भएको जनाएको छ ।  क्रान्तिकारीले नेपाली शिक्षकहरुले वैज्ञानिक व्यवहारिक जिवन उपयोगी, नि : शुल्क र सर्वशुलभ शिक्षा तथा मर्यादित शिक्षण पेशाका निम्ति निकै लामो, कठिन र बलिदानीपूर्ण संघर्ष गर्दै आएको जनाएको छ ।

अहिले सम्मका सबै सरकारहरुले शिक्षकहरुको आन्दोल चर्किदै जादा आन्दोलनलाई मत्थर पार्ने नियतका साथ शिक्षकहरुका माग पुरा गर्ने सम्झौता गर्दछ तर सरकारले आफैले गरेको सम्झौता लागु गर्दैन यस्तो क्रम बारम्बार दोहोरिरहेको कारण सरकार प्रति शिक्षकहरुको विश्वास गुम्दै गएको छ भनेर एक्यबद्धता पत्रमा उल्लेख गरिएको छ । विद्यालय शिक्षा ऐन जारी गर्न माग गर्दै काठमाण्डौमा प्रदर्शन गरिरहेका शिक्षकहरूले आज दिउँसो टर्च लाइट बालेर प्रदर्शन गरेका छन् । बानेश्वर–बबरमहल सडक खण्डमा भेला भएका शिक्षक–कर्मचारीहरूले दिउँसै मोबाइलको टर्च बालेर सरकार खोज्दै साङ्केतिक विरोध गरेका हुन् ।

यसअघि शिक्षकहरूले सडकमा सुतेर, सिठी बजाएर तथा कालो मास्क लगाएर मौन प्रदर्शन गरेका थिए । शिक्षकहरूले अविलम्ब विद्यालय शिक्षा ऐन जारी गर्न माग गरेका छन् । गुणस्तरीय विद्यालय शिक्षा, विद्यार्थी र शिक्षक–कर्मचारी मैत्री विद्यालय शिक्षा ऐन जारी गर्नुपर्ने माग राख्दै महासङ्घको नेतृत्वमा देशभरका शिक्षकहरू आन्दोलनमा छन् ।

उनीहरूले चैत २० गतेदेखि काठमाण्डौमा प्रदर्शन गर्दै आएका हुन् । सरकारले वार्तामा बोलाइरहेपछि ऐन जारी गर्ने अवस्था नआएसम्म शिक्षकहरू वार्तामा नजाने अडानमा छन् । यो निर्णायक आन्दोलन भएको र यस पटक ऐन जारी नभई नफर्कने उनीहरूको भनाइ छ ।