भूमि आयोग ओखलढुगांद्वारा जिल्लामा जग्गा नापजाँच सुरु

चैत्र ३०, सोलुखुम्बु । भूमि समस्या समाधान आयोग ओखलढुगांले जिल्लामा जग्गा नापजाँच सुरु गरेको छ । आयोगले जिल्लाका विभिन्न स्थानीय तहमा पुगेर भूमिहीन र सुकुम्बासीलाई निस्सा दिन थालिएको आयोगका जिल्ला अध्यक्ष पुरुषोत्तम लुइटेले जानकारी दिनुभयो । जिल्लाका आठ वटा स्थानीय तहहरुमध्ये तीन वटा स्थानीय तहमा पुगेर भूमिहीन र सुकुम्वासीलाई निस्सा दिइएको छ ।

हालसम्म जिल्लाको मोलुङ गाउँपालिकाका १४ जना, सुनकोशी गाउँपालिकाका पाँच र मानेभन्ज्याङ गाउँपालिकाका सात जनालाई निस्सा प्रदान गरिएको उहाँको भनाई छ । जिल्लाका आठ स्थानीय तहमा ४४ जना भूमिहीन सुकुम्बासी, ९ जना भूमिहीन दलित र १ जना अव्यवस्थित बसोबासी गरि कुल ५४ जनाको तथ्याङ्क रहेको आयोगले जनाएको छ । सुकुम्बासीलाई लालपूर्जा वितरण गर्नको लागि निस्सा प्रदान गर्ने काम भइरहेको छ ।

निस्सा पाएकाहरुमध्ये सुकुम्बासीले ठाउँ अनुसार कम्तिमा १० आना जग्गा पाउनेछन् । जग्गा प्राप्तिका लागि सुकुम्वासीले बसिरहेको ठाउँमा पहिलो प्रथामिकता हुनेछन् । त्यो वाहेक वडा, पालिकाभित्र, जोडिएको पालिका वा नेपालका कुनैपनि ठाउँमा तोकिए त्यो ठाउँमा जग्गा पाउनेछन् ।