काँगेलमा सार्वजनिक सुनुवाइ सम्पन्न, ६१ लाख बजेटमा २२ योजना

बैशाख १०, सोलुखुम्बु । सोलुखुम्बुको थुलुङ दुधकोशी गाउँपालिका वडा नम्बर २ काँगेलको सार्वजनिक सुनुवाइ सम्पन्न भएको छ ।  रेडियो एभरेष्टको सहजिकरण तथा थुलुङ दुधकोशी गाउँपालिकाको आयोजनामा सम्पन्न भएको सार्वजनिक सुनुवाई मङ्गलबार वडा कार्यालय काँगेलमा सम्पन्न भएका हो ।  

सम्पन्न सार्वजनिक सुनुवाइमा वडा अध्यक्ष युजन बस्नेतको सभापतित्व रहेको थियो भने वडाका सदस्यहरू, वडा सचिव लगायत कर्मचारीहरू, टोल सुधार समितिका अध्यक्ष एवं पदाधिकारीहरू लगायतको उपस्थिति रहेको थियो ।  सार्वजनिक सुनुवाईमा वडा सचिव प्रेम सिंह मेहताले चालु आर्थिक वर्षमा वडाले सञ्चालन गरेका योजना तथा कार्यक्रमहरूको जानकारी गराउनुभएको थियो ।

वडाले चालु आर्थिक वर्ष २०८१/८२ मा जम्मा ६१ लाख रुपैयाँकाे सिलिङ बजेट कार्यान्वयन गरिरहेको छ भने २२ वटा योजना तथा कार्यक्रम उक्त बजेटबाट कार्यान्वयन गरेको उहाँले जानकारी गराउनुभएको थियो । सार्वजनिक सुनुवाइका क्रममा कार्यक्रमका सभापति एवं वडा अध्यक्ष युजन बस्नेतले वडामा आएको बजेटलाई समुचित ढङ्गले बाँडफाँड गरि नागरिकलाई सेवा दिइएको बताउनुभएको थियो ।  

उहाँले ग्रामीण भेगका वडाहरूमा विभिन्न समस्या रहेको उल्लेख गर्दै उक्त समस्याहरू समाधानका लागी वडाको बजेटले नभ्याउने र राज्यले सानो रकम वडामा पठाइँदिदा सबै मागहरू सम्बोधन गर्न नसकिएको स्वीकार गर्नुभएको थियो ।