सोलुखुम्बुको थामेमा सकियो ‘सगरमाथा संवाद’को पूर्व कार्यक्रम

बैशाख १०, सोलुखुम्बु । नेपाल सरकारले आगामी जेठ २ देखि ४ गतेसम्म आयोजना गर्न लागेको ‘सगरमाथा संवाद’ को पूर्व कार्यक्रम सोलुखुम्बुको थामेमा सम्पन्न भएको छ । ‘साथसाथै फाउन्डेसन’ले तीनै तहका सरकारको समन्वयमा आयोजना गरेको कार्यक्रमको मंलबार उद्घाटन गर्दै रक्षामन्त्री मानवीर राईले पृथ्वी बचाउ अभियानमा सबै एकताबद्द हुनुपर्ने बताउनु भयो ।

उहाँले जलवायु परिवर्तनका क्षेत्रमा नेपाल सरकारले राष्ट्रिय र अन्तर्राष्ट्रिय समुदायसँग सहकार्य गर्ने पनि बताउनुभयो । यसैका लागि सरकारले सगरमाथा संवादको आयोजना गरेको उहाँको भनाइ थियो । जलवायु परिवर्तनको असरका कारण हिमताल बिस्फोट हुँदा आएको बाढीले पर्यटकीय क्षेत्र थामे बस्ती तहसनहस बनाएको स्मरण गराउँदै मन्त्री राईले थामे बस्ती पुनर्निर्माणको काम सरकारले अघि बढाउने प्रतिबद्धता जनाउनुभयो ।

कार्यक्रममा वन तथा वातावरण मन्त्री ऐनबहादुर शाहीले जलवायु परिवर्तनजन्य विपत्तिबाट प्रभावित समुदायको पुनःस्थापना र पुनर्निर्माणमा नेपाल सरकार आफैंले अग्रसता लिएर काम अघि बढाउने घोषणा गर्नुभएको छ । मन्त्री शाहीले बाढीपीडित बस्तीको पुनर्निर्माणलाई सरकारले ‘अपनत्व’ लिएको जानकारी दिँदै सरकार सधैँ खुम्बुबासीको पक्षमा रहेको बताउनुभयो ।