ओखलढुंगामा ट्याक्टर दुर्घटना : घाईते पाँच जनाको सोब्रुमा उपचार हुँदै

बैशाख १०, सोलुखुम्बु । ओखलढुंगाको मानेभञ्ज्याङमा ट्याक्टर दुर्घटना हुँदा ५ जना घाइते भएका छन् । बुधबार बिहान करिब ७ बजेको समयमा मानेभञ्ज्याङ गाउँपालिका वडा नम्बर ६ सोक्माटार हिलेपानी जयरामघाट सडक खण्डमा ट्याक्टर दुर्घटना हुँदा ५ जना घाइते भएको जिल्ला प्रहरी कार्यालय ओखलढुंगाले जानकारी दिएको छ ।

घाइते हुनेमा टयाक्टरमा सवार मानेभञ्जयाङ गाउँपालिका वडा नम्बर २ का धनकुमार बि.क, मनकुमार बि.क, भाईकाजि राई, झनक श्रेष्ठ र तुल बहादुर श्रेष्ठ रहेको जिल्ला प्रहरी कार्यलय ओखलढुंगाका प्रहरी निरिक्षक एवंम सूचना अधिकारी विजय कार्कीले जानकारी दिनुभयो ।

जयरामघाटबाट सिमेन्ट, पानीको ड्रम बोकि सोक्माटार तर्फ आउदै गरेको स १ त ६११६ नम्बरको टयाक्टरको पछाडीको ट्रलिको हिच पिन भाचिन गई दुर्घटना भएको जनाइएको छ । घाईतेहरुको सामुदायिक अस्पताल सोब्रुमा उपचार भइरहेको छ । ट्याक्टर चालकलाई प्रहरीले नियन्त्रणमा लिएको प्रहरीले जनाएको छ ।