सोलु प्रहरीले तयार गर्याे चार भाषामा जनचेतनामुलक सन्देश

बैशाख १०, सोलुखुम्बु । जिल्ला प्रहरी कार्यालय सोलुखुम्बुले चार भाषामा जनचेतनामुलक सन्देश तयार पारेको छ । विभिन्न जातजातिको बसोबास रहेको हिमाली जिल्लामा आगलागी नियन्त्रण सम्बन्धी चार भाषामा जनचेतनामुलक सन्देश तयार पारेको हो । जस्मा शेर्पा, तामाङ, थुलुङ र कुलुङ भाषा समावेश गरिएको जिल्ला प्रहरी कार्यालय सोलुखुम्बुको प्रहरी नायव उपरीक्षक द्धारिका प्रसाद घिमिरेले जानकारी दिनुभयो ।

चैत, वैशाख र जेठ महिनामा सुक्खा मौसम हुने, हावाहुरी चल्ने, घर, पसल, कार्यालय र वनलगायत विगतका वर्षमा धेरै जनधनको क्षति भएकाले त्यसतर्फ नागरिकलाई सावधानी अपनाउनका लागि आ आफ्नो मातृभाषाबाट सहजै बुझिने तवरबाट उक्त सामाग्री तयार पारिएको जनाइएको छ ।

सन्देशमा भनिएको छ “गर्मी समय अगाबै वन क्षेत्रबाट सुख्खा पातपतिङगर, स्याउला तथा प्रज्वलनशिल पदार्थहरु वन क्षेत्र बाहिर ल्याई सुरक्षित तरिकाले व्यवस्थापन गरी वन डढेलो हुने जोखिम न्युनिकरण गर्ने, प्राय ः आगोलागी प्राकृतिक कारण नभई मानविय लापारबाहि, जानजानी र भूलवज्ञश पनि हुने भएकाले होसियारीपूर्वक आगोको प्रयोग गर्ने, सामुदायिक वन लगायतका वन क्षेत्रमा अग्नी नियन्त्रण रेखा निर्माण गर्ने, हावाहुरी चलेको समयमा आगो सम्बन्धी कुनै पनि काम नगरौँ, गर्नै परे घरभित्र झ्यालढोका राम्रोसँग बन्द गरेर गरौँ । घरमा खाना पकाई सकेपछि आगो पूर्ण रुपमा निभाऔँ” लागयतका जनचेतनामुलक सन्देशहरु ४ भाषामा तयार पारिएको जिल्ला प्रहरी कार्यालय सोलुखुम्बुले जनाएको छ ।