सगरमाथा संवाद तोकिएको समयमै हुने, भारत पाकिस्तान युद्वले कुनै प्रभाव नपार्ने प्रष्टिकरणा 

बैशाख २७, साेलुखुम्बु ।  छिमेकी देश भारत र पाकिस्तानबीच बढ्दो तनावले नेपालले आयोजना गर्न लागेको सगरमाथा संवाद प्रभावित हुनसक्ने आँकलन गरिएको छ । सगरमाथा संवाद आउँदो शुक्रवारदेखि काठमाण्डौमा शुरू हुँदैछ । सरकारले सगरमाथा संवाद तोकिएको समयमै हुने जनाएको छ ।

विगतमा कोरोना महामारीका कारणले रोकिएको थियो । वन तथा वातावरण मन्त्रालयका सहसचिव एवम् सगरमाथा संवादको सचिवस्तरीय कमिटीका सदस्य–सचिव महेश्वर ढकालले यसपटक तोकिएकै समयमा कार्यक्रम हुने दाबी गर्नुभयो । उहाँले सगरमाथा संवादलाई भारत र पाकिस्तानको तनावले कुनै प्रभाव नपार्ने बताउनुभएको छ ।

सदस्यसचिव ढकालले सगरमाथा संवादका लागि सहभागिता सुनिश्चित गरेका कुनै पनि विदेशी प्रतिनिधिले सुरक्षा जोखिमबारे अहिलेसम्म चासो नदेखाएको पनि स्पष्ट पार्नुभयो । साथै प्रतिनिधिहरुले आफ्नो भ्रमण स्थगित गर्ने कार्यक्रमबारे पनि जानकारी नगराएको उहाँको भनाइ छ । सगरमाथा संवाद आउँदो जेठ २ देखि ४ गतेसम्म हुँदैछ । संवादमा जलवायु परिवर्तनले पारेको विश्वव्यापी र क्षेत्रीय असरको बारेमा छलफल केन्द्रित हुनेछ ।