प्रथम सागादावा दौड : म्याराथनको उपाधि चुम्यो आर्मीले (फाेटाे फिचर सहित)

बैशाख २८, सोलुखुम्बु । प्रथम अन्तराष्ट्रिय सागादावा रनिङ फेस्टिभलको म्याराथन तर्फको उपाधी नेपाल आर्मीले हात पारेको छ ।  आइतबार सम्पन्न ४२ दशमलव २ किमि म्याराथनको महिला तथा पुरुष दुबै तर्फको उपाधि नेपाल आर्मीका धावकहरूले हात पारेका हुन ।  थेक्छेन पेमा छोलीङ गुम्बाको आयोजनामा जारी सागा दावा दौड महोत्सव तथा कला सम्मेलनको दौड तर्फको म्याराथनमा पुरुष तर्फको उपाधि आर्मीका करण रावलले ३ घण्टा १९ मिनेट ८ सेकेन्डमा निर्धारित दूरी पार गर्दै हासिल गरेका हुन् ।  यस्तै महिला तर्फको प्रथम उपाधि नेपाल आर्मीकै सुनसरी रोकायाले हात पारेकी छन् ।  भने पुरुष तर्फको द्वितीय र तृतीय स्थान क्रमशः कुल बहादुर बस्नेत र मिलन राईले हात पारेका छन् ।  

यस्तै महिला तर्फको द्वितीय र तृतीय स्थान क्रमशः सोलुखुम्बुकी अनिता राई र ओखलढुङ्गाकी छोकी शेर्पाले जितेकी छन् ।  म्याराथन तर्फ प्रथम, द्वितीय र तृतीय स्थान हासिलगर्ने महिला पुरुष दुबै तर्फका धावकहरूले पुरस्कार राशि क्रमशः ७५ हजार, ५० हजार र ३५ हजारको साथमा मेडल र प्रमाणपत्र प्राप्त गरेका छन् । यस्तै हाफ म्याराथन २१ किलोमिटर तर्फको प्रथम द्वितीय र तृतीय स्थान महिला तर्फ र पासाङ ल्हामु तामाङ, शोर्णीमा शेर्पा र आङ फुर्वा शेर्पाले जितेका छन् ।  यस्तै पुरुष तर्फ मान कुमार रोक्का, गोपाल तामाङ र किरण थुलुङले जितेका छन् ।

हाफ म्यारथन तर्फका प्रथम, द्वितीया, तृतीय स्थान हासिल गर्ने उनीहरूले पुरस्कार राशि क्रमशः ३५, २५ र १५ हजार रुपैयाँ प्राप्त गरेका छन् ।  यता ११ किमि तर्फका धावकहरू शिव रायमाझी, टङ्क बहादुर कार्की र दिपेशहाङ राईले निर्धारित दूरी पार गर्दै प्रथम, द्वितीय र तृतीय हासिल गरेका छन् भने महिला तर्फको ११ कमी रायल राईले प्रथम स्थान हासिल गरेकी छन् ।  उनीहरूले पुरस्कार राशि क्रमशः २५ हजार, २० हजार र १५ हजारका साथमा मेडल र प्रमाणपत्र प्राप्त गरेका छन्  ।

शनिवार सम्पन्न फन रन ५ किमि दौडको पुरुष तर्फ प्रथम, द्वितीय, तृतीय स्थान क्रमश पुकार बस्नेत, विकास तामाङ र मिङ्मा दोर्जीले हासिल गरे भने महिला तर्फ करिश्मा मगर, रोनिश्का कार्की र टिका भुजेलले हासिल गर्दै पुरस्कार राशि क्रमशः १५ हजार, १० हजार र ५ हजारको साथमा मेडल र प्रमाणपत्र प्राप्त गरेका छन् ।