उदयपुरका एक बालकसहित तीन बालक बाल सुधार गृहबाट फरार

बैशाख ३०, सोलुखुम्बु ।  विराटनगरस्थित कोशी बाल सुधार गृहबाट तीन जना बालक फरार भएका छन् । मोरङको विराटनगर–३ मा अवस्थित सुधार गृहबाट सोमबार ती बालकहरू फरार भएको प्रहरीले जनाएको छ । मोरङ प्रहरीका अनुसार फरार हुनेहरूमा उदयपुर, झापा र ताप्लेजुङ घर भएका १७ देखि १८ वर्ष उमेर समूहका बालकहरू छन्। उनीहरू सुधार गृहको निगरानीबाट कसरी भागे भन्ने विषयमा अनुसन्धान भइरहेको प्रहरीको भनाइ छ ।

उदयपुरका १८ वर्षीय बालकलाई अदालतले १६ वर्ष ८ महिना कैद सजाय सुनाएको थियो र उनी तीन वर्षदेखि सुधार गृहमा थिए। झापा र ताप्लेजुङका बालकहरू भने पाँच महिनाअघि मात्र पुर्पक्षका लागि सुधार गृहमा ल्याइएका थिए । मोरङ प्रहरी प्रवक्ता डीएसपी वेदप्रकाश जोशीले फरार बालकहरूको खोजी तीव्र पारिएको जानकारी दिनुभएको छ । सुधार गृहबाट बालकहरू भाग्नु गम्भीर सुरक्षा चुनौती भएको भन्दै प्रहरीले निगरानी प्रणाली पुनरावलोकन गर्नुपर्ने आवश्यकता देखिएको जनाएको छ ।