थुलुङ दुधकोशीको मुक्ली र कोशीपारिको सिधा सडक सम्बन्ध तोडियो, बाढीले बगायो ह्‍युमपाइप 

बैशाख ३०, सोलुखुम्बु ।  सोलुखुम्बुको थुलुङ दुधकोशी गाउँपालिकाको कोशी पारीका वडा जान प्रयोग गरिएको ह्युम पाईप बाढीले बगाएको छ ।  गएराती परेको पानीले गाउँपालिकालाई कोशी पारिका ३ वटा वडासँग जोड्न कोशी माथि राखिएका ह्युम बगाइदिएको हो ।  प्रि मनसुनकै समयमा आएको बाढीले ह्‍युमपाइप बगाइदिएपछि कोशी पारिका ३ वडाका नागरिकलाई गाउँपालिका आउजाउमा समस्या हुने भएको छ ।

 वडा नम्बर ४, ५ र ९ लाई गाउँपालिका केन्द्र मुक्लीसँग जोड्ने उक्त ह्‍युमपाइप केही समय अघिमात्रै राखिएको थियो ।  ह्‍युमपाइप बगाएपछि कोशी पारिका ३ वटा वडाका नागरिकलाई सिधा सडक सञ्जालबाट विच्छेद हुन पर्ने अवस्था शृजना भएको छ ।  यहाँका नागरिकलाई झोलुङ्गे पुल एकमात्र विकल्प बनेको छ ।  यद्यपि मोटरेवल पुन निर्माणको कामलाई पनि गाउँपालिकाले प्राथमिकतामा राखेर अघि बढिरहेको भन्दै गाउँपालिकाका प्रवक्ता भोजराज कार्कीले चाँडैनै यो समस्याबाट मुक्ती हुनेकुरामा विश्वास व्यक्तः गर्नुभएको छ ।