संयुक्त आधारभूत विद्यालयमा शेर्पा भाषामा शिक्षण सुरु

बैशाख ३०, सोलुखुम्बु । ओखलढुंगाको सिद्धिचरण नगरपालिका–७ मा अवस्थित संयुक्त आधारभूत विद्यालयमा शेर्पा भाषामा औपचारिक शिक्षण सुरु गरिएको छ । १५६९ औँ बुद्ध जयन्तीको अवसरमा आयोजित विशेष समारोहका बीच स्थानीय विषय अन्तर्गत शेर्पा भाषामा पठनपाठन थालिएको हो । उद्घाटन समारोहमा जिल्ला समन्वय समितिका प्रमुख टेकराज भट्टराई, सिद्धिचरण नगरपालिकाका प्रमुख तेजेन्द्र खनाललगायत विशिष्ट अतिथिहरुले संयुक्त रुपमा शेर्पा भाषामा शिक्षणको उद्घाटन गर्नुभएको थियो ।

कार्यक्रमको अवसरमा कक्षा १ देखि ५ सम्मका विद्यार्थीहरूलाई ‘भोट भाषा’ नामक पुस्तक वितरण गरिएको र भोलिदेखि नियमित कक्षा सञ्चालन हुने विद्यालयले जनाएको छ । विद्यालयका प्रधानाध्यापक चुडामणि भट्टराईका अनुसार, अबदेखि बालकक्षा देखि कक्षा ५ सम्म शेर्पा भाषामा पठनपाठन हुनेछ । यससँगै विद्यार्थीहरुले शेर्पा भाषा र सम्भोटा लिपिसहित शेर्पा संस्कृति तथा बौद्ध संस्कारसमेत सिक्ने भएका छन् । विशेषतः शेर्पा समुदायका विद्यार्थीहरू लामा पठनका लागि विद्यालय छाड्न बाध्य भइरहेकाले अभिभावकको मागअनुसार यो कार्यक्रम सुरु गरिएको प्रधानाध्यापक भट्टराईले बताउनुभयो ।

हाल विद्यालयमा ४८ जना विद्यार्थी रहेका छन् र भविष्यमा विद्यार्थी संख्या बढ्ने अपेक्षा गरिएको छ । कार्यक्रममा नेपाल बौद्ध महासंघ काठमाडौंका सल्लाहकार आर्चाय नुर्वु शेर्पाले अमेरिकामा अवस्थित बौद्ध शिक्षा आयोजक संस्थाबाट सम्भोटा लिपि, शेर्पा तथा भोट भाषा अध्यापनमा सहयोग पुर्याइएको जानकारी गराउँदै विद्यालयको मागअनुसार एक जना आर्चायसमेत पठाइएको बताउनुभयो ।

नगरप्रमुख तेजेन्द्र खनालले नगरभित्र रहेका सबै जातजातिको भाषा र संस्कृतिको संरक्षण तथा प्रवद्र्धनमा नगरपालिका प्रतिबद्ध रहेको उल्लेख गर्दै आगामी दिनमा शेर्पा संघको मागअनुसार आवश्यक सहयोग गर्ने प्रतिबद्धता व्यक्त गर्नुभयो । यो पहलले स्थानीय भाषाको संरक्षणसँगै शेर्पा समुदायको शिक्षा पहुँचलाई थप मजबुत बनाउने अपेक्षा गरिएको छ ।