प्रतिफल आउने ठाउँमा मात्रै हवाई पूर्वाधार बनाउन सांसद शेर्पाको आग्रह

बैशाख ३१, सोलुखुम्बु । राष्ट्रियसभामा नेकपा एमाले सांसद सोनाम गेल्जेन शेर्पाले प्रतिफल आउने ठाउँमा मात्रै हवाई पूर्वाधार बनाउन आग्रह गर्नुभएको छ । राष्ट्रियसभाको बुधवारको बैठकमा सरकारले प्रस्तुत गरेको बजेटका सिद्धान्त र प्राथमिकतामाथिको छलफलमा भाग लिँदै उहाँले यस्तो बताउनुभएको हो । उहाँले माग आएको ठाउँमा हवाई पूर्वाधार बनाउने नभई आवश्यकता भएको र प्रतिफल आउने ठाउँमा मात्रै हवाई पूर्वाधार विकास गर्न आग्रह गर्नुभयो ।

उहाँले साहसिक खेलहरू, पर्यापर्यटन, पूर्वाधार विकासलाई तीव्रता दिन माग गर्नुभयो । उहाँले पर्यटन विकासका लागि वन तथा निकुञ्ज क्षेत्रको उपयोग गर्ने कुरा जटिल भए पनि त्यसको सही सदुपयोग हुनुपर्ने बताउनुभयो । सांसद शेर्पाले विद्युत् उत्पादनलाई हाइड्रोपावरमा मात्रै नभई वैकल्पिक विद्युत्मा पनि जानुपर्ने बताउनुभयो ।