उदयपुरबाट लागूऔषधसहित एक युवक पक्राउ

बैशाख ३१, सोलुखुम्बु । उदयपुरको त्रियुगा नगरपालिका–६ लालपत्ताबाट नियन्त्रित लागुऔषधसहित एक युवकलाई प्रहरीले पक्राउ गरेको छ । पक्राउ पर्ने व्यक्ति त्रियुगा नगरपालिका–१३ बस्ने २१ वर्षीय पारस राई हुन् । प्रहरीका अनुसार राईलाई मंगलबार बेलुकी लालपत्ताबाट खटिएको प्रहरी टोलीले पक्राउ गरेको हो । लहानबाट गाईघाटतर्फ आउँदै गरेको ना.१ ज ६८९३ नम्बरको विङगर गाडीमा सवार अवस्थामा उनलाई नियन्त्रणमा लिइएको थियो ।

प्रहरीले राईको साथबाट डाईजेपाम, फेनारगन र बुप्रेनोर्फिन नामक लागुऔषधको ९–९ एम्पुल बरामद गरेको जनाएको छ । ती सबै औषधि नेपाल सरकारद्वारा नियन्त्रित लागुऔषधको सूचीमा परेका छन् । हाल उनलाई आवश्यक अनुसन्धानका लागि प्रहरी हिरासतमा राखिएको छ भने यस सम्बन्धमा थप अनुसन्धान भइरहेको प्रहरीको भनाइ छ ।