शेर्पा बालबालिका सहायता संघको पहलमा सोलुखुम्बुका ६३ विद्यार्थीलाई छात्रवृत्ति वितरण, करिब ६ सय जनालाई वितरण गर्ने लक्ष्य

बैशाख ३१, सोलुखुम्बु । हिमाली जिल्ला सोलुखुम्बुमा शेर्पा बालबालिका सहायता संघको विशेष पहलमा ६३ जना विद्यार्थीलाई छात्रवृत्ति प्रदान गरिएको छ । संघको पहलमा तथा लोरेन नेपाल फ्रान्सको आर्थिक सहयोगमा प्रदान गरिएको छात्रवृत्ति जुनबेशी माविका २५ जना र बुद्ध एकेडेमी आविका ३८ जना गरी कुल ६३ जना विद्यार्थीलाई वितरण गरिएको हो ।

संघका अध्यक्ष निमा शेर्पाका अनुसार विद्यालयमा अध्ययनरत असहाय, आर्थिक रूपले विपन्न तथा पिछडिएको वर्गका विद्यार्थीलाई शैक्षिक क्षेत्रमा केही राहत पुगोस् भन्ने उद्देश्यले छात्रवृत्ति प्रदान गरिएको हो । संघले आगामी दिनमा छात्रवृत्ति वितरणको कार्यक्रमलाई विस्तार गर्दै जेठ १ गते बेनी आवि, २ गते सेतीदेवी आवि र तामाखानी आवि, ३ गते नमो बुद्ध आवि, ४ गते हेवा, नुन्थाला र रिङमो, ५ गते रामपुर आवि र सुन्दर झरना आवि, ६ गते जिवन ज्योति मावि र सगरमाथा माविका विद्यार्थीलाई छात्रवृत्ति प्रदान गर्ने योजना बनाएको छ ।

त्यस्तै, जेठ ७ गते लुरा, फाप्लु, सल्लेरी र छुटेका विद्यार्थीहरुलाई फाप्लुस्थित नुम्बुर होटलमा छात्रवृत्ति वितरण गरिने कार्यक्रम रहेको संघका संयोजक सन्त बहादुर मगर (र्याबिट) ले जानकारी दिनुभयो । उहाँका अनुसार यो अभियानमार्फत करिब ६ सय जना विद्यार्थीहरुलाई छात्रवृत्ति प्रदान गर्ने लक्ष्य रहेको छ ।

कार्यक्रममा लोरेन नेपाल फ्रान्सका सहयोगी दाताहरुको पनि उपस्थिति रहेको थियो । छात्रवृत्ति प्राप्त गरेपछि विद्यार्थीहरू खुशी व्यक्त गरेका छन् भने विद्यालय परिवार र अभिभावकहरूले सहयोगी दाताप्रति आभार प्रकट गरेका छन् । यस्तै जिल्लाकै एक मात्र बहुमुखी क्याम्पस, सोलुखुम्बु बहुमुखी क्याम्पसमा विगतका दिनहरुमा छात्रावृद्धि प्राप्त गर्दै आएका विद्यार्थीहरुलाई आगामी दिनहरुमा पनि छात्रावृद्धि प्रदान गर्ने प्रतिबद्धता व्यक्त गरेको छ ।