थर्पुडाँडा माविका विद्यार्थीलाई अक्षय कोषबाट छात्रवृत्ति प्रदान

बैशाख ३१, सोलुखुम्बु । खोटाङ जिल्लाको केपिलासगढी गाउँपालिका–५ मा अवस्थित थर्पुडाँडा माध्यमिक विद्यालयका विद्यार्थीलाई विभिन्न अक्षय कोषमार्फत छात्रवृत्ति प्रदान गरिएको छ । शैक्षिक सत्र २०८१ को पुरस्कार वितरण तथा छात्रवृत्ति कार्यक्रम बुधबार विद्यालय परिसरमा सम्पन्न भएको छ । कार्यक्रमको अध्यक्षता विद्यालय व्यवस्थापन समितिका अध्यक्ष रुपलाल राईले गर्नुभयो, भने प्रमुख अतिथि वडा नम्बर ५ का अध्यक्ष हिमाल भक्त राई रहनुभयो ।

कार्यक्रममा विद्यालयका उत्कृष्ट अभिभावक तथा विभिन्न बिधागत पुरस्कार समेत वितरण गरिएको थियो । विद्यालयका प्रधानाध्यापक ज्ञानु राईका अनुसार लक्ष्मण निरौला अक्षय स्मृति कोष, मनमाया राई स्मृति अक्षय कोष, ममिता राई शैक्षिक अक्षय कोष, र दिपेन्द्र कुमार निरौला शैक्षिक अक्षय कोषबाट प्राप्त वार्षिक व्याज रकमबाट आर्थिक रुपमा कमजोर, विपन्न तथा जेहेन्दार आठ जना विद्यार्थीलाई छात्रवृत्ति वितरण गरिएको हो ।

प्रधानाध्यापक राईले छात्रवृत्तिले विद्यार्थीको शैक्षिक उपलब्धिमा उल्लेखनीय वृद्धि हुने अपेक्षा गरिएको बताउनुभयो । यसका साथै बिर्ख बहादुर–धुर्वकुमारी बस्नेत अक्षय कोषबाट छात्रवृत्ति वितरण एसइइ परीक्षाको नतिजा प्रकाशन पछि गरिने जनाइएको छ ।