शेर्पा बालबालिका सहायता संघको छात्रवृत्ति वितरण कार्यक्रम जारी

जेठ २, सोलुखुम्बु । शेर्पा बालबालिका सहायता संघको पहलमा तथा लोरेन नेपाल फ्रान्सको आर्थिक सहयोगमा सोलुखुम्बुमा छात्रवृत्ति वितरण कार्यक्रम सक्रिय रूपमा जारी रहेको छ । बैशाख ३० गतेदेखि सुरु गरिएको यो अभियान अन्तर्गत आर्थिक रूपमा कमजोर, असहाय तथा पिछडिएको वर्गका विद्यार्थीहरूलाई लक्षित गर्दै छात्रवृत्ति प्रदान गरिँदै आएको छ । उक्त कार्यक्रम अन्तर्गत आज (शुक्रबार) सेतिदेवी आविका ५७ जना र तामाखानी आविका २१ जना गरी कुल ७८ जना विद्यार्थीलाई छात्रवृत्र् िवितरण गरिएको छ ।

यसअघि संघले बेनी आविका २७ जना, जुनबेशी माविका २५ जना र बुद्ध एकेडेमी आविका ३८ जना गरी ६३ जना विद्यार्थीलाई छात्रवृत्ति प्रदान गरिसकेको छ । छात्रवृत्तिबाट विद्यार्थीहरूको शैक्षिक पहुँच विस्तार हुने संघका अध्यक्ष निमा शेर्पाको विश्वास रहेको छ । आगामी दिनहरूमा कार्यक्रमलाई निरन्तरता दिँदै संघले जेठ ३ गते नमो बुद्ध आवि, ४ गते हेवा, नुन्थाला र रिङमो, ५ गते रामपुर आवि र सुन्दर झरना आवि, तथा ६ गते जीवन ज्योति मावि र सगरमाथा माविमा छात्रवृत्ति वितरण गर्ने तालिका बनाएको छ ।

संघका संयोजक सन्त बहादुर मगर (र्याबिट) का अनुसार जेठ ७ गते लुरा, फाप्लु, सल्लेरी लगायत छुटेका विद्यार्थीहरूलाई फाप्लुस्थित नुम्बुर होटलमा छात्रवृत्ति वितरण गरिने कार्यक्रम तय गरिएको छ । यस अभियानमार्फत करिब ६ सय विद्यार्थीलाई छात्रवृत्ति प्रदान गर्ने लक्ष्य राखिएको छ । छात्रवृत्ति प्राप्त गरेपछि विद्यार्थीहरूमा उत्साह थपिएको छ भने विद्यालय प्रशासन र अभिभावकहरूले सहयोगी दाताप्रति आभार प्रकट गरेका छन् ।