कालिका आधारभूत विद्यालय पूर्ण आवासीयमा रूपान्तरण, २२ नयाँ विद्यार्थी थपिए

जेठ २, सोलुखुम्बु । खोटाङको रावाबेँसी गाउँपालिका–१ स्थित दम्कुमा रहेको कालिका आधारभूत विद्यालय यस शैक्षिक सत्रदेखि पूर्ण आवासीयमा रूपान्तरण गरिएको छ । तामाङ र राई समुदायको बसोबास रहेको दम्कुमा समुदायको सक्रिय सहभागितामा विद्यालय सञ्चालन हुँदै आएको छ । वि.सं २०३६ मा स्थापना भएको विद्यालयले यस वर्ष गाउँपालिकाबाट कक्षा ८ सम्म सञ्चालनको अनुमति पाएको छ ।

कक्षा २ सम्म अङ्ग्रेजी माध्यममा पढाइ हुने विद्यालयलाई क्रमशः कक्षा ८ सम्म पूर्ण अङ्ग्रेजी माध्यममा लैजाने लक्ष्य लिइएको छ । आवासीय विद्यालयमा हाल १४ छात्र र २० छात्रा पूर्ण आवासीय रूपमा भर्ना भएका छन्। छात्रछात्राका लागि छुट्टाछुट्टै बसोबासको व्यवस्था मिलाइएको छ भने शिक्षक र शिक्षिका पनि छुट्टाछुट्टै तोकिएका छन् । विद्यालयमा आवश्यक सिरक, तन्ना, डसना गाउँपालिकाले उपलब्ध गराएको छ भने अन्य सामग्री विद्यालयले जुटाएको छ ।

विद्यालयलाई पूर्ण आवासीय बनाउन चन्दा सङ्कलनमार्फत लाख १४ हजार सहयोग प्राप्त भएको आर्थिक सङ्कलन समितिका संयोजक विशाल राईले जानकारी दिनुभयो । विद्यालयको औपचारिक उद्घाटन गाउँपालिका प्रमुख फटिककुमार श्रेष्ठ, उपप्रमुख कौशिला गुरुङ र प्रशासकीय अधिकृत सरोज रेग्मीले गर्नुभएको छ ।

प्रधानाध्यापक टीकाराम राईका अनुसार, आवासीय प्रणाली लागू गरेपछि विद्यालयमा यस वर्ष २२ नयाँ विद्यार्थी थपिएका छन् । उहाँले संस्कारसहितको गुणस्तरीय र व्यावहारिक शिक्षा प्रदान गर्ने उद्देश्यले विद्यालयलाई आवासीय बनाइएको बताउनुभयो ।