महाकुलुङमा महिला स्वास्थ्य स्वयंसेविकालाई ९ दिने आधारभूत तालिम

जेठ ३, सोलुखुम्बु । सोलुखुम्बुको महाकुलुङ गाउँपालिका वडा नंम्बर ५ का महिला स्वास्थ्य स्वयंसेविकालाई लक्षित गर्दै ९ दिने आधारभूत तालिम सञ्चालन गरिएको छ । तालिम जिल्ला स्वास्थ्य समन्वय इकाई र महाकुलुङ गाउँपालिका स्वास्थ्य शाखाको संयुक्त आयोजना तथा आर्थिक वर्ष २०८१/०८२ को बजेट अन्तर्गत सञ्चालन गरिएको हो । तालिम सञ्चालनका लागि जिल्लाबाट १ लाख रुपैयाँ र गाउँपालिकाको स्वास्थ्य शाखाबाट ५० हजार रुपैयाँ बजेट विनियोजन गरिएको स्वास्थ्य शाखा प्रमुख हरिप्रसाद आचार्यले जानकारी दिनुभयो ।

तालिमको उद्घाटन महाकुलुङ गाउँपालिका अध्यक्ष सुर्य बहादुर राई र निमित्र् प्रमुख प्रशासकीय अधिकृत झमक बहादुर कटुवालको विशिष्ट उपस्थितिमा गरिएको आयोजकले जनाएको छ । तालिमको मुख्य उद्देश्य सामुदायिक स्तरमा सहज र सुलभ रूपमा स्वास्थ्य सन्देश प्रदान गर्ने, सुरक्षित मातृत्व र नवजात शिशुको स्वास्थ्य सुरक्षा सुनिश्चित गर्ने, गर्भावस्था, सुत्केरी अवस्था र नवजात शिशुको मृत्युदर न्यूनीकरण गर्ने, साथै रोकथाम गर्न सकिने रोगहरूको पहिचान र नियन्त्रण गर्न महिला स्वास्थ्य स्वयंसेविकालाई सक्षम बनाउने रहेको छ ।

महाकुलुङ गाउँपालिकाका साथै सोताङ गाउँपालिकाका महिला स्वास्थ्य स्वयंसेविकाहरूलाई पनि समेटेर तालिम दिइएको सहकर्मी झलक राईले जानकारी दिनुभयो । यस किसिमको तालिमले ग्रामीण भेगका महिलाहरूमाझ स्वास्थ्यसम्बन्धी चेतना अभिवृद्धि गर्नुका साथै प्राथमिक स्वास्थ्य सेवामा पहुँच विस्तार गर्न मद्दत पुग्ने विश्वास लिइएको छ ।