खरिखोला आधारभूत अस्पतालबाट १ सय बढी नागरिकले नि :शुल्क दन्त सेवा प्राप्त

जेठ ३, सोलुखुम्बु । सोलुखुम्बुको खुम्बु पासाङल्हामु गाउँपालिका–१ स्थित खरिखोला आधारभूत अस्पतालमा सञ्चालित नि शुल्क दन्त स्वास्थ्य शिविरबाट १ सयभन्दा बढी नागरिकले सेवा प्राप्त गरेका छन्। शनिबार सुरु भएको शिविरमा पहिलो दिनमै १२२ जना नागरिकले दाँत सम्बन्धी उपचार सेवा लिएका हुन्। खुम्बु पासाङल्हामु गाउँपालिका र सोलुखुम्बु डेण्टलको आयोजनामा तथा वडा नम्बर १ को समन्वयमा सञ्चालन गरिएको उक्त शिविरमा अनुभवी तथा दक्ष दन्त चिकित्सक र दन्त स्वास्थ्यकर्मीको टोली परिचालन गरिएको छ। शिविरमा दाँत झिक्ने, भर्ने, सफा गर्ने लगायतका सेवा प्रदान गरिएको आयोजकले जनाएको छ। दुई दिनसम्म सञ्चालन हुने शिविर आइतबारसम्म जारी रहनेछ। स्थानीय बासिन्दाले दुर्गम क्षेत्रमै गुणस्तरीय तथा निस्शुल्क दन्त सेवा पाउँदा खुसी व्यक्त गरेका छन्।