संखुवासभामा विद्यालय सम्पर्क कार्यक्रम सकियो लैङ्गिक हिंसा र बालअधिकारबारे कानूनी सचेतना

जेठ ६, सोलुखुम्बु । जिल्ला प्रहरी कार्यालय संखुवासभाको आयोजना तथा कोशी प्रदेश प्रहरी कार्यालय विराटनगर र महिला, बालबालिका तथा जेष्ठ नागरिक सेवा केन्द्रको निर्देशनमा विद्यालय सम्पर्क कार्यक्रम सफलतापूर्वक सम्पन्न भएको छ । खाँदबारी नगरपालिका वडा नम्बर १ मा अवस्थित हिमालय माध्यमिक विद्यालयमा आयोजित कार्यक्रममा विद्यालयका शिक्षक र कक्षा १० मा अध्ययनरत करिब ६० जना विद्यार्थीहरुको सहभागिता रहेको थियो ।

कार्यक्रममा जिल्ला प्रहरी कार्यालय संखुवासभाका प्रहरी निरीक्षक अभिषेक कुमार श्रेष्ठले लैङ्गिक हिंसा, बालविवाह, बाल यौन दुव्र्यवहार, जबरजस्ती करणी लगायत बालबालिकामाथि हुने विभिन्न प्रकारका अपराध सम्बन्धी कानूनी जानकारी तथा सचेतनामूलक प्रशिक्षण दिनु भएको छ । कार्यक्रमका क्रममा सहभागी विद्यार्थी र शिक्षकहरुले उठाएका प्रश्न तथा अभिभावकबाट आएका गुनासाहरुको समेत समाधान गरिएको जनाइएको छ ।

प्रहरी निरीक्षक श्रेष्ठले यस्ता कार्यक्रमले विद्यालय, विद्यार्थी र प्रहरीबीचको सम्बन्ध सुदृढ गर्नका साथै कानूनी चेतना बढाउन सघाउ पुग्ने विश्वास व्यक्त गर्नुभयो । संखुवासभा जिल्ला प्रहरी कार्यालयले आगामी दिनहरूमा पनि यस प्रकारका सचेतनामूलक कार्यक्रमलाई निरन्तरता दिने जनाएको छ ।