शेर्पा बालबालिका सहायता संघको छात्रावृत्ति कार्यक्रम भोली सम्पन्न हुँदै

जेठ ६, सोलुखुम्बु । शेर्पा बालबालिका सहायता संघको आयोजनामा सञ्चालन भइरहेको छात्रावृत्ति कार्यक्रम भोली (बुधबार) सम्पन्न हुँदैछ । संघले गत बैशाख ३० गतेदेखि सुरु गरेको यस कार्यक्रम अन्तर्गत सोलुखुम्बुका विभिन्न विद्यालयमा अध्ययनरत विद्यार्थीहरुलाई छात्रावृत्ति वितरण गरिएको हो । संघका संयोजक सन्त बहादुर मगर (र्याबिट) का अनुसार मंगलबार जीवन ज्योति माध्यमिक विद्यालय नेलेका २८ जना विद्यार्थीलाई छात्रावृत्ति वितरण गरिएको छ ।

साथै सगरमाथा माध्यमिक विद्यालय च्याल्सा परिसरमा आयोजित कार्यक्रममा सगरमाथा मावि च्याल्सा, सेकारसिङ आवि, सिद्धार्थ आवि गार्मा र गार्मा मावि गार्माका गरी कुल ६८ जना विद्यार्थीहरुले छात्रावृत्ति प्राप्त गरेका छन् । भोलीको अन्तिम चरणको कार्यक्रम फाप्लुस्थित नुम्बुर होटलमा आयोजना गरिनेछ, जसमा लुरा, फाप्लु, सल्लेरी लगायतका क्षेत्रका विद्यार्थीलाई छात्रावृत्ति वितरण गरिने संघले जनाएको छ ।

कार्यक्रममा शेर्पा बालबालिका सहायता संघका अध्यक्ष निमा शेर्पा लगायत सहयोगीदाताहरुको उपस्थिति रहेको थियो । संघले यो कार्यक्रम मार्फत दुर्गम हिमाली क्षेत्रका विद्यार्थीलाई शिक्षा प्राप्तिमा सहजता पुर्याउने विश्वास व्यक्त गरेको छ । संघको यो पहलले सोलुखुम्बुका ग्रामीण बस्तीमा शिक्षाको पहुँच विस्तारमा महत्वपूर्ण भूमिका खेल्ने अपेक्षा गरिएको छ ।