सगरमाथामा वसन्त आरोहण सिजन : ३९५ जनाले सफल आरोहण

जेठ ६, सोलुखुम्बु । वसन्त ऋतुको आरोहण सिजनमा हालसम्म ३ सय ९५ जनाले विश्वको सर्वोच्च शिखर सगरमाथा सफलतापूर्वक आरोहण गरेका छन्। पर्यटन विभागका अनुसार तीमध्ये १ सय ५३ जना अनुमति लिएका अन्तर्राष्ट्रिय आरोही हुन् भने २ सय ३५ जना शेर्पा सहयोगी रहेका छन्। बाँकी ७ जना डोरी टाँग्ने प्राविधिक समूहका सदस्य हुन्।

विभागका अनुसार सगरमाथा आरोहणका लागि यस सिजनमा ४७ समूहका ४ सय ६८ जनाले अनुमति लिएका छन्। सगरमाथासहित कुल २७ हिमालमा १२७ समूहका १ हजार १ सय ६८ जनाले आरोहण अनुमति लिएका छन्। सगरमाथामा मौसम अनुकूल भएपछि आरोहण तीव्र गतिमा जारी रहेको छ। यो वर्ष सगरमाथा आरोहणका लागि ५७ देशका आरोहीहरूले अनुमति लिएका छन्।

वसन्त सिजनमा हिमाल आरोहणका लागि उपयुक्त मौसम हुने भएकाले यस समयमा सगरमाथासहितका अन्य हिमालहरूमा उल्लेख्य संख्यामा आरोही आकर्षित हुने गर्छन्।