माप्यमा अपाङ्गता भएका व्यक्तिहरुलाई लक्षित ६ दिने घुम्ती स्वास्थ्य शिविर सम्पन्न, १०९ जनाले पाए सेवा

जेठ ७, सोलुखुम्बु । कोशी प्रदेश सामाजिक विकास मन्त्रालय, माप्य दुधकोशी गाउँपालिका र करुणा फाउण्डेशनको संयुक्त साझेदारीमा सञ्चालित ‘अपाङ्गता रोकथाम तथा पुनःस्थापना कार्यक्रम’ अन्तर्गत माप्य दुधकोशी गाउँपालिकामा ६ दिने घुम्ती स्वास्थ्य शिविर सफलतापूर्वक सम्पन्न भएको छ । गाउँपालिकाको आयोजनामा जेठ १ गतेबाट सुरू भएको शिविर खास्ताप प्राथमिक अस्पतालमा २ दिन, जुभिङ, काँकु र वाकुका स्वास्थ्य चौकीहरू तथा समृद्धि महिला भवन, वाकुमा १ दिनका लागि सञ्चालन गरिएको थियो ।

शिविरमा १०९ जना अपाङ्गता भएका व्यक्तिहरूले प्रत्यक्ष स्वास्थ्य परीक्षण तथा उपचार सेवा प्राप्त गरेका छन् । शिविरमा खास्ताप प्राथमिक अस्पतालका एमबिबिएस डाक्टर प्रशान्त राईसहित विभिन्न स्वास्थ्य संस्थाका स्वास्थ्यकर्मीहरूले सेवा प्रदान गरेका थिए । कार्यक्रमका क्रममा एकदिने क्षयरोग (टीबी) सम्बन्धी अभिमुखीकरण तथा खोज अनुसन्धान कार्यक्रम पनि सम्पन्न गरिएको थियो । त्यस अवसरमा ३० जना शंकास्पद व्यक्तिहरुको खकार संकलन गरी परीक्षणका लागि पठाइएको गाउँपालिका स्वास्थ्य शाखा संयोजक जितेन्द्र यादवले जानकारी दिनुभयो ।

शिविरले दुर्गम बस्तीका अपाङ्गता भएका व्यक्तिहरूलाई घरमै नजिक स्वास्थ्य सेवा पु¥याउने उद्देश्य पुरा गरेको जनाइएको छ । स्थानीय तहको पहल, प्रदेश सरकारको सहकार्य र सामाजिक संस्थाको सहयोगबाट यस्ता कार्यक्रम प्रभावकारी बनाइने विश्वास लिइएको छ ।