जाङ्बु शेर्पाद्वारा दोस्रो पटक सगरमाथा आरोहण सफल

जेठ ७, सोलुखुम्बु । सोलुखुम्बु जिल्ला, थुलुङ दुधकोशी गाउँपालिका वडा नम्बर ९, लोखिम निवासी जाङ्बु शेर्पाले दोस्रो पटक विश्वको सर्वोच्च शिखर सगरमाथाको सफल आरोहण गरेका छन्। उनले यही जेठ ५ गतेका दिन सगरमाथा शिखरमा नेपालको रक्षा मन्त्री मनवीर राईको तस्वीर सहितको झण्डा फहराउँदै आफ्नो आरोहण सम्पन्न गरेका हुन्।

शेर्पाले यसअघि पनि सगरमाथाको सफल आरोहण गरिसकेका थिए, र यो उनको दोस्रो ऐतिहासिक यात्रा हो। शेर्पाको यो सफलताको खबरले स्थानियवासीहरूमा खुसीको लहर फैलिएको छ। थुलुङ दुधकोशी गाउँपालिकाका स्थानीय नेताहरूले जाङ्बुको सफल आरोहणले गाउँको नाम अन्तर्राष्ट्रिय स्तरमा चिनाउन मद्दत पुगेको भन्दै बधाई तथा शुभकामना व्यक्त गरेका छन्।

सगरमाथा आरोहणको क्रममा उनले सामना गर्नुपर्ने कठिन मौसम, उच्च हिमाली जोखिम र भौगोलिक चुनौतीहरूका बाबजुद, दृढ इच्छाशक्ति र अनुभवका बलमा उनले सफलता प्राप्त गरेका हुन्। शेर्पाले भावी दिनमा पनि सगरमाथा लगायतका अन्य हिमालहरूको संरक्षण र प्रवर्द्धनका लागि योगदान पुर्‍याउने प्रतिबद्धता जनाएका छन्।