पेल्माङ विकासका लागि सहयोगी हातहरु संस्थाबाट विपन्न परिवारलाई जस्तापाता हस्तान्तरण 

जेठ ८, सोलुखुम्बु ।   सोलुखुम्बुको महाकुलुङका १५ विपन्न परिवारलाई सहयोगी हातहरु संस्थाले जस्तापाता हस्तान्तरण गरेको छ  ।  महाकुलुङ क्षेत्रमा विभिन्न सामाजिक सेवामा सक्रिय पेल्माङ विकासका लागि सहयोगी हातहरु संस्थाले महाकुलुङ गाउँपालिका वडा नम्बर २ का विपन्न परिवारहरूलाई लक्षित गर्दै सहयोग गरेको  हो ।

संस्थाले आर्थिक रूपमा कमजोर १५ घरपरिवारलाई जस्तासहितको छाना छाउनका लागि जस्तापाताको सहयोग गरेको हो ।  स्थानीय स्तरमा घर निर्माण तथा मर्मतमा कठिनाइ भोगिरहेका परिवारहरूलाई सहज आवास सुविधा पुर्‍याउने उद्देश्यले जस्तापाता वितरण गरिएको संस्थाका अध्यक्ष मछिन्द्र कुलुङले जानकारी दिनुभयो । जस्तापातासंगै किलाकाँटी, प्लेनसिट समेत उपलब्ध गराएको हो । वितरण कार्यक्रममा महाकुलुङ गाउँपालिका वडा नम्बर २ का अध्यक्ष प्रदीप कुलुङ लगायत वडा सदस्यहरु, लाभग्राही परिवार र संस्थाका पदाधिकारीहरूको उपस्थिति थियो ।

यसैबीच सोही वडाको चोङ्खिदो टोलका महिलाहरूलाई कोदो कुट्ने विद्युतीय मेसिन पनि हस्तान्तरण गरिएको छ । महिलाहरूलाई कृषिमा सहजताको लागी उनीरुलाई उक्त मेसिन हस्तान्तरण गरिएको जनाइएको छ ।  यस्तै सो क्षेत्रमा कृषिबालीमा क्षति गर्ने बाँदर तथा भालु धपाउने मेसिन ३ वितरण गरिएको छ ।

सामाग्री वितरण गर्दै संस्थाले भविष्यमा पनि यस किसिमका सामाजिक सहयोग कार्यक्रमलाई निरन्तरता दिने प्रतिबद्धता जनाएको छ । लाभग्राहीहरूले संस्थाको सहयोगप्रति आभार व्यक्त गर्दै आगामी दिनमा सहयोगलाई अझ विस्तार गर्दै जाने कुरामा प्रतिवद्ध रहनुपर्ने जनाइएको छ ।  । त्यस्तै सहयोगी संस्थालाई धन्यवाद व्यक्त गर्दौ बाकी दिनमा पनि निरन्तर सहयोगको लागि वडा अध्यक्ष कुलुङले अनुरोध पनि गर्नुभएको छ ।