सोलुखुम्बु बहुमुखी क्याम्पसका बौद्ध विषयका विद्यार्थीलाई छात्रवृत्ति वितरण, अध्ययनमा थप ऊर्जा

जेठ ८, सोलुखुम्बु । सोलुखुम्बुको सोलुदुधकुण्ड नगरपालिका–५ मा अवस्थित सोलुखुम्बु बहुमुखी क्याम्पसले कक्षा ११ मा बौद्ध विषय अध्ययनरत १० जना विद्यार्थीलाई प्रतिव्यक्ति ६० हजार रुपैयाँ बराबरको छात्रवृत्ति वितरण गरेको छ । क्याम्पसले बिहीबार आयोजना गरेको एक अनौपचारिक कार्यक्रमका बीच मासिक १० हजार रुपैयाँका दरले ६ महिनाको छात्रवृत्ति एकमुष्ट प्रदान गरिएको हो । क्याम्पसका प्रमुख उद्धव कुमार शर्माका अनुसार, यो छात्रवृत्ति मंसिर, पुस, माघ, फागुन, चैत्र र बैशाख महिनाको लागि प्रदान गरिएको हो ।

छात्रवृत्ति वितरण गरिएको विद्यार्थीहरूमा सोम बहादुर तामाङ, पसी शेर्पा, आङफुर्वा शेर्पा, शोमा शेर्पा, करिश्मा मगर, दावा तेन्जी शेर्पा, सेर्कीलमु शेर्पा, पेमा यंगु शेर्पा र अस्मिता तामाङ रहेका छन् । छात्रवृत्तिको व्यवस्थापन तथा सहयोगमा आङ छिरिङ शेर्पा र डा. लक्ष्मी अवलले विशेष भूमिका निर्वाह गर्नुभएको क्याम्पसले जनाएको छ । उहाँहरूले बौद्ध अध्ययन तथा वातावरण विज्ञान विषयप्रति रुचि राख्ने विद्यार्थीहरूलाई आर्थिक अभावमा पर्न नदिन निरन्तर सहयोग गरिरहनुभएको छ । कार्यक्रममा बोल्दै प्रमुख शर्माले दाताहरूलाई आभार व्यक्त गर्दै विद्यार्थीहरूलाई “इच्छाशक्तिका साथ अध्ययनलाई निरन्तरता दिन र छात्रवृत्तिलाई प्रेरणाको स्रोत बनाउन” आग्रह गर्नुभयो । साथै, बौद्ध विषय अध्यापन गराउने शिक्षकले पनि छात्रवृत्तिलाई मात्र होइन, शिक्षालाई प्राथमिकता दिन विद्यार्थीहरूलाई प्रेरित गर्नुभएको थियो ।

छात्रवृत्ति प्राप्त गरेका विद्यार्थीहरूले खुसी व्यक्त गर्दै भने, “हामी यस सहयोगको सदुपयोग गर्दै फजुल खर्च नगरी अध्ययनका लागि आवश्यक खर्चमा प्रयोग गर्नेछौं।” उनीहरूले क्याम्पसको प्रगतिशील सोच र प्रेरणादायी कदमको प्रसंसा गर्दै कृतज्ञता प्रकट गरेका थिए । सोलुखुम्बु बहुमुखी क्याम्पसको यो पहलले शिक्षामा पहुँच, गुणस्तर र समावेशीतालाई मजबुत बनाउँदै आएको देखिन्छ। विशेषगरी ग्रामीण तथा आर्थिक रूपले पछाडि परेका विद्यार्थीहरूका लागि यस्तो छात्रवृत्तिले उत्कृष्ट प्रेरणा र मार्गदर्शनको काम गरेको छ ।