महाकुलुङ–२ का बिरामी बसन्त कुलुङका लागि स्थानीयको सहयोगमा घर निर्माण

जेठ ८, सोलुखुम्बु । सोलुखुम्बुको महाकुलुङ गाउँपालिका वडा नम्बर २ चोङ्खिदोका बिरामी बसन्त कुलुङका लागि स्थानीयको सहयोगमा नयाँ घर निर्माण गरिएको छ। विगत केही महिनादेखि गम्भीर स्वास्थ्य समस्याबाट ग्रसित ३७ वर्षीय कुलुङ काठमाडौंमा परिवारसहित बस्दै आएका थिए। तर, आफ्नो स्थायी घर नभएको अवस्थामा स्थानीय बासिन्दा, शुभेच्छुक र सामाजिक संस्थाहरूको सहकार्यमा कुलुङ परिवारका लागि सुरक्षित बासस्थानको व्यवस्था गरिएको हो।

घर निर्माणको पहल महाकुलुङ–२ का बासिन्दाहरूको सामूहिक श्रमदानबाट सुरु गरिएको थियो। छानाको लागि आवश्यक पर्ने जस्तापाता, किलाकाटी तथा प्लेनसिटजस्ता निर्माण सामग्री ‘पेल्माङ विकासका लागि सहयोगी हातहरू’ संस्थाले उपलब्ध गराएको संस्थाका अध्यक्ष मछिन्द्र कुलुङले बताउनुभयो । घर निर्माण सम्पन्न भई हालै एक कार्यक्रमबीच बसन्त कुलुङको परिवारलाई घर हस्तान्तरण गरिएको हो।

उक्त कार्यक्रममा महाकुलुङ–२ का वडा अध्यक्षसहित अन्य स्थानीय जनप्रतिनिधिहरूको पनि उपस्थिति रहेको थियो। वडा अध्यक्षले सामाजिक सहकार्य र एकताको प्रशंसा गर्दै भने, “समाजमा एक अर्काप्रतिको माया र साथ आवश्यक हुन्छ। बसन्त दाजु बिरामी अवस्थामा हुनुहुन्छ, हामीले उहाँको परिवारलाई सुरक्षित बासस्थान दिलाउन सक्यौं भन्नेमा गर्व लागेको छ।” स्थानीयको सहयोग र सहकार्यबाट सम्पन्न घर निर्माणले बसन्त कुलुङ परिवारलाई ठूलो राहत मिलाएको परिवारका सदस्यहरूले बताएका छन्।

यो उदाहरणले गाउँ–समुदायमा संकटको बेलामा एकता र मानवीय सहयोग कस्तो प्रभावकारी हुनसक्छ भन्ने देखाएको सहकर्मी उद्धव कुलुङले जानकारी दिनुभयो ।